【台語世界／錄音】鑽過磅空，就到宜蘭

是按怎欲揀這篇：
雪山磅空是真無簡單ê工事，hōo宜蘭kap台北tsiânn做「一工生活圈」。工事對交通有利益，suah也對生態有影響。行tī tsit條路--裡，鑽過濟濟磅空，leh欣賞景緻ê時，mā ài kā磅空ê名ke眼--幾-下，uì tsia-ê地名走揣lán自然kap文化ê記持。

台灣目前上長ê磅空是佇「蔣渭水（Tsiúnn Uī-suí）高速公路（北宜高速公路，國道五號）」頂，來往台北到宜蘭之間ê「雪山（Suat-suann）磅空」。照長度來看，咱這个磅空，現此時，嘛是亞洲第六、世界第九長ê公路磅空。

蔣渭水高速公路佇2006年中通車，伊ê頭、尾點是對南港系統到蘇澳，是宜蘭縣來去大台北地區和台灣西爿ê交通重要道路。阮頭一擺駛車走這條高速公路，是揀一个普通時，對南港到宜蘭運動公園，前後差不多四、五十分鐘；當日暗時轉來南港，敲電話共阮欲八十歲ê媽媽報平安ê時，嘛予伊驚一下！

當然，這條高速公路會當通車，愛感謝誠濟國內外工作人員ê犧牲佮奉獻。沿路佇石碇仔（Tsio̍h-tīng-á）服務區有徛北宜高速公路工程殉職人員紀念碑；佇雪山磅空口頭城這爿有蔣渭水紀念碑。

這陣，uá南港、內湖、汐止（Si̍k-tsí，舊名「水tńg跤」）遮有客運分四个路線咧走。遮的四个路線頭前，攏是對台北圓山仔（Înn-suann-á）發車，經過南港車頭轉運西站、南港展覽館，佇南港聯絡道接「福爾摩沙（Formosa）高速公路（國道三號）」，來到南港系統交流道接這條國道五號了後，按車票路線，共咱直接載到頭城烏石港、宜蘭、羅東（Lô-tong，註一），抑是南方澳仔。

坐客運行國道五號，看車窗外ê景緻，好天ê時，有青山綠水、藍天白雲、溪墘人家來做伴；若拄著落雨天，就好親像有人提供墨水毛筆畫，予咱來欣賞。清楚ê地標告示，嘛予咱知影這條高速公路頂，有烏塗溪橋、南港磅空、石碇仔磅空、烏塗磅空、彭山（舊名「崩山」）磅空；當看著正手爿、坪林（Pînn-nâ）彼个漆殕藍色半圓型ê鐵橋ê時，客運車就隨駛入來雪山磅空，啊～心肝頭嘛會隨共咱應講：鑽過磅空，就到宜蘭！

讀予你聽：

（作者是台灣母語聯盟理事；本文由台灣母語聯盟提供。）

註一：羅東ê地名是對當地原住民Kebalan（『噶瑪蘭』）語言ê「rutung（意思是猴山--a）」來--ê。
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・認bat雪山磅空（維基百科）
・【台語世界／錄音】Gâu早，南港！
・【台語世界／錄音】Lán ê古蹟就是lán ê歷史

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。