【台語世界／錄音】台灣教育改革嘛ài心靈改革

是按怎欲揀這篇：
教育是lán一世人中ng ê大代誌，台灣ê教育改革uì 1994年ê四一〇大遊行起鼓，到tann二十幾冬--ah。本文作者以親身經驗，指出教育現場實際拄--著ê情形，koh提出「自愛、感動、學好」ê新觀念，hōo lán讀者參考，mā thang進一步思考。​

台灣教育改革，自1990年以來，行「敨放、自由」的路，無論法條、師資、課程、教學、教科冊、經費……攏有誠大的改變，會使講是自古以來上大的教育變動。有的人支持，有的人看衰。世界千變萬化，欲培養未來的人才，改革是定著ài--的。用古早的教育方式，無法度教出二十一世紀資訊化、全球化、國際化的世界公民。

1994年4月初10，民間團體發動「四一〇教改大遊行」，有四个訴求，內底佮國民教育較有關係--的是：第一，小班小校，逐班上濟三十个學生，逐校上濟三十班。第二，廣設高中、大學，欲予囡仔攏有機會讀高中、大學。第三，推動教育現代化，師資、教材多元化，學校社區化，家長參與，民間辦學，消除集體管理，強化幼稚園，弱勢族群主體教育。第四，制定《教育基本法》，用現代教育的基本精神，對根本改造台灣的教育。四一〇大遊行予人看做是台灣教育改革的起鼓，彼四項訴求嘛是後--來教育改革的重點。

我1992年開始佇國中教冊，家己的囡仔嘛佇這个改革的潮流內底出世大漢，見證二十幾冬來教育現場的量變佮質變。到tann，我的教育熱誠原在，毋過嘛真感慨。第一，小班小校是少子化生成的無奈的結果，少子化是這馬上大的國家危機，無人就無經濟，國家會一直倒退。第二，廣設高中、大學無補顛倒魯，入學傷簡單，學生無挑戰、奮鬥的心，造成國民素質降低；家長若較有法度，仝款拚勢欲共囡仔tsinn入去名校，少子化就予遐的傷過頭濟的私立學校關關--起-來。第三、師資多元，教育學程四界開，少子化學生無遐濟，變出流浪教師；教材多元致使冊錢愈來愈貴，內涵嘛無較懸；學校社區化欲拆圍牆，囡仔的安全tsua̋nn有掛慮；予家長參與，變做七爺八爺干涉烏白舞，害老師驚驚毋敢管教囡仔；惡質的老師佮家長勾結，叫是in家長會、教師會家己是主體，無歡喜就烏白hue，共倩校長、老師的投票權la̍k-tiâu--咧，無尊存、無大無細，磕袂著就大細聲。第四，一寡教育法tsiânn做破壞根本的惡法，立法--的大部份是大官、大教授，「目睭看著粿，無看著火」，無了解基層，kan-na欲「自由、敨放」，欲予行政人員以外的人做學校的頭家，莫怪老師、家長、學生開會的時，in的言行舉止，袂輸有免責權的立法委員，伊上大，啥物攏毋驚。求「權利」會，盡「義務」免，有歹頭家的臭煬（tshàu-iāng），無好頭家的身範（sin-pān）。家長會用「無專業」來管教育專業，教師會用心機佮行政做對頭，攑尚方寶劍烏白刣、伊上gâu，教育改革改甲這號形敢tio̍h？

最近有兩件社會新聞，予我閣感慨--起-來，無講袂使：第一件，是有人「造假」，用世界有名的Times雜誌的封面，加總統府、加鐵網、加字，共台灣比做鐵幕，佇網路傳，刁工拍歹台灣的名聲。咱台灣屬移民島嶼，自古有族群對立，毋過，「落水平平沉，全無重頭輕」，敢有需要佇國家處境遮艱難的時陣，閣共台灣tu̍h一空？這是有自由、有創意，毋過無是非。第二件，是藝人狄鶯的後生孫安佐，佇美國「滾耍笑」講伊欲攑銃射全校，警察掠著伊違法買1,608粒銃子，違法家己鬥銃。飯會當烏白食，話敢會當烏白講？藝人家長攏共送去上好、上開錢的學校，予伊上好的教育，煞教甲欲刣人無法律觀念，無教伊的心善良，是佗咧好？咱的教育改革除了改制度，tang時才會有巧巧人想著ài改「心」？老師、家長、學生的心無改，才會有遮的毋捌代誌的人。

教育改革想欲「敨放、自由」誠好，制度改革嘛誠重要，毋過閣較重要--的是「心靈改革」──家長的心ài成全囡仔多元能力的全人發展；老師的心ài做好模樣；學生的心ài教予有善良的溫柔佮有捌義理的勇敢。毋是少子化，就放予囡仔妖魔化管袂行。正港的自由是對家己的行為負完全的責任，毋是無限無制。面對少子化國家危機的教育改革，咱更加ài重視教育品質。十二年國民教育的課綱欲予囡仔「自發、互動、共好」，敢會當順紲教囡仔有「自愛、感動、學好」這款善良的心？按呢，個人、家庭、學校、國家的未來，才會「自動好」。

讀予你聽：

（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】「有私心」佮「師有心」──偏遠學校師資問題的思考
・【台語世界／錄音】為台語老師請命 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。 
請上【台語世界】閱讀閣較濟相關文章。