是按怎欲揀這篇：
好戲猶未煞，咱鼓柄tio̍h繼續紲--落-去。無論是tī廟埕、門埕ia̍h是墓埕，鼓離袂開咱ê生活，成做咱語言文化內底豐富、媠氣ê諺語。Tsia-ê語詞uì傳統搬到現代，仝款提醒--咱：通鼓、phiāng鼓ài分hōo清，做一个古意善良ê台灣人。
頭一篇起鼓的文章就超過八百字， 殘殘（tshân-tshân）共伊扯擺（tshé-pái），毋過話無講完，心內礙虐（gāi-gio̍h），啊都痚呴（he-ku）袂忍得嗽--啦。無法度，鼓柄就閣共紲--落-去，叫做紲鼓。毋過，總著佇這篇講完，才袂顧人怨，算是煞鼓，所以這篇文章就是共鼓講紲--落-去，講到煞鼓為止，才有「紲鼓，煞鼓」這款奇怪的標題。
第四種鼓就是青盲仔大鼓。五十年前，咱人若出山，就是棺柴做頭前，紲落來是一陣（tīn）的青盲仔大鼓，閣來才是幾若陣的排子（pâi-tsí）、鑼鼓陣、南管、北管等。青盲仔大鼓就是一陣青盲--的，拖一粒大鼓，摃甲無攬無絡（bô-lám-bô-le）、毋成聲說（m̄-tsiânn-siann-sueh），是按怎會當排佇第二坎（khám）呢？原來咱台灣人有一種講法，青盲佇陽間（iông-kan）無看--見，毋過佇陰間in是目睭金，所以愛in來𤆬（tshuā）路。這个風俗，照我的察理（tshat-lí），是佇人過身時，好心做一个善事，共青盲組一个大鼓隊，按呢予in有一項頭路，加減趁一寡外路仔，這就是古意善良的台灣人--啦。
第五種是大竹管（tik-kóng）做--的，一頭留竹目（tik-ba̍k），一頭繃牛皮，拍牛皮這爿就有phōng-phōng抑是phiāng-phiāng的聲音。兩頭結（kat）索仔吊佇頷頸。若是走江湖的掛--咧，就是通鼓，若是乞食掛--咧，就是唪鼓（phiāng-kóo），這是「仝款無仝師傅」，乞食毋是好名，唪鼓嘛毋是好聲，絕對毋通拂毋著（hut-m̄-tio̍h）--去。
五種鼓講煞，換來講對鼓生出來的一寡咱的話。頭一句，「鼓佇內，聲佇外」，就是講咱人毋管做啥物好歹代誌，攏會傳--出-去，佮這句相倚意--的有：「做粿袂掩得人的喙」、「鴨卵較密嘛有縫」。閣有一句是「鼓做鼓拍，簫做簫歕（pûn）」，簫佮鼓是罕得鬥陣--的，所以這句話是講『你走你的陽關道，我過我的獨木橋』，嘛會使講「隨人討米，隨人落鼎」、「龜做龜討食，鱟做鱟peh壁」。
鑼佮鼓是定定連咧講，毋才有鑼鼓陣、鑼鼓班、鑼鼓點等這款咱的語詞，會使講是「褲帶結相連」。毋過鑼佮鼓是無仝聲，咱若講「人前一面鑼，人後一面鼓」，就是講有人「喙無趁心肝」，面頭前是講甲好鑼好鼓，尻川後煞是歹心甕肚（àng-tōo）。
八百字到矣，也是我煞鼓的時陣。毋過，我猶是好心奉勸，咱佇社會行踏（kiânn-ta̍h），溜溜瞅瞅（liu-liu-tshiu-tshiu），食兩蕊目睭，咱愛會曉分曉（hun-hiáu）唪鼓佮通鼓、銅鑼佮皮鼓。
☆詞彙學習☆
【殘殘】：『橫下心來』
【扯擺】：『告一段落』
【礙虐】：『不舒服』
【痚呴袂忍得嗽】：『不吐不快』，痚呴是『痚喘病』
【排子】『北管曲調的一種』
【無攬無絡】：『有氣無力』
【毋成聲說】：『不成曲調』
【察理】：『推敲』
【竹目】：『竹節』
【仝款無仝師傅】：『同而不同』
【拂毋著】：『搞錯』
【甕肚】：『壞心眼』
【行踏】：『行走』
【溜溜瞅瞅】：『睜亮眼睛』
【分曉】：『辨別』
讀予你聽：
（作者是李江却台語文教基金會董事長，有kap陳憲國合編《台灣諺語典》、《華語台語對照典》；本文由李江却台語文教基金會提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
【台語世界／錄音】台語起鼓，台灣人起鼓
傳統戲劇、音樂相關詞彙（教育部台灣閩南語常用詞辭典）
〈曲跤撚喙鬚〉ê歌詞：「社會是溜溜瞅瞅，萬事tio̍h靠目睭」（Youtube）
（tsia使用教育部推薦漢字kap台羅）
若欲投稿，請寄：binpotgb@gmail.com，文章字數 600-800。
請至【台語世界】閱讀更多相關文章。
專欄屬作者個人意見，本報純粹提供意見交流平台，不代表本報立場。
