【台語世界／錄音】顧本土母語ài過5關──話頭

是按怎欲揀這篇：
台語人ê語言hông禁久--來，總--是有寡怨慼需要tháu氣；怨慼煞，mā是骨力繼續去拚語言復振ê種種難關。無論行tó一條路，請永遠會記得，咱是有濟濟語言kap文化ê美麗寶島，逐家互相尊重、多元共存，才是咱民主社會ê好範勢。

本土母語長期受外來政權𧿬踏（thún-ta̍h），已經m̄成樣。Beh救活ê路猶真長。我雖然無願意相信像南社社長張復聚醫生所講：本土母語koh 30冬tō滅亡。M̄-koh想想--leh，確實真困難救。我tsit-má beh講--ê是：Beh救本土母語ê路，猶有重重（tîng-tîng）關卡，有心救母語ê有志，ài有長期奮鬥ê決心才ē-sái。

一般beh救本土母語ài過4關，台語kap客語因為hām漢字ko-ko-tînn，suah ài ke 1關，成做5關。時間ê關係，咱今仔日kan-na講一下仔話頭，另工才koh一關一關來說明：

第1關：我kā叫「母語關」，台灣人已經hông教育無要意ka-tī母語ê死活，suah tuè外來統治者（thóng-tī-tsiá）ê話尾行，講「語言只是溝通工具，講會通tō好」，何必koh強調母語來分裂族群。到底是siáng「分裂族群」？Hia-ê外來政權欺壓（khi-ap）lán ê母語，無需要道歉（tō-khiam），顛倒kā beh救母語ê人加上「分裂族群」ê罪名，你kám願意忍受？

第2關：是關係書寫ê「書寫關」。Tsē-tsē台語講kah真好ê人，mā是認為台語ē-hiáu講tō好，m̄免ē-hiáu寫。無去想：無書寫，tō無法度留落創作kap文獻；無書寫，tō無法度流傳較遠、較闊、較久；無書寫，tō無法度準確表達語言；無書寫，tō無法度進入體制、行向世界；無書寫，tō無法度得著重視kap發言權。到尾--à，無書寫ê語言只好等待死亡。

第3關：是kap漢字ko-ko-tînn才有ê「漢字關」。原住民較好運，in自來是用羅馬字，無受漢字汙染。 台語kap客語因為迷戀漢字，台灣人suah無法度kā台語kap客語寫hōo好。文字工具siōng重要是準確koh有效率來記錄語言，nā歹學koh歹用，kan-na強調優美kám有啥mih路用？台灣人kám猶願意kha̍h tī漢字，繼續做母語ê「青盲牛」？

第4關：「羅馬字關」，台灣人真khiàng，有工具m̄ tō m̄用，beh用tō ka-tī創--一-套，爭beh出頭。 白話字已經用將近150冬，簡單koh好用，文獻mā已經累積bē少，詞典koh真齊備（tsiâu-pī），kám有需要koh創一套bô kâng ê羅馬字pan頭做起。新--ê未經過考驗，kám會比經過150冬洗禮ê白話字較好用？

第5關：「堅持關」。這關siōng莫名其妙，公開演講ê時，tō算有95％ ê人聽有，只要有人講『講大家聽得懂的話』，演講者tō kā母語sak一邊。這tsiânn怪奇，你若去國外，kám會要求人講你聽有ê話，是你ài學聽人ê話才tio̍h。聽演講ê場合，這khuán無禮貌ê要求，人kám會tshap--你？Tsit-má咱知ta̍k-ê聽有ê話只是華語，nā án-ne lueh--去，tang時才輪著ē-tàng用母語？

台語人號稱（hō-tshing）超過80％，m̄-koh hōo外來政權用hit套「結合次要敵人，打擊主要敵人」ê àu步來分化。In使弄人數較少ê原住民kap客家人，藉口「閩南大沙文主義」來攻擊台語。事實獨霸（to̍k-pà）ê華語才是「超級大沙文主義」，suah無人去kā挑戰。

台灣人ài看ē出外來政權ê àu步，m̄-thang繼續hōo in使弄。

讀予你聽：

註：本文使用教育部推薦漢字kap台羅，thang上教育部台灣閩南語常用辭典查詢語音kap語意；『 』內底用華語發音。

（作者是台灣羅馬字協會理事，本文由台灣羅馬字協會提供）

請參照【傳統白話字】

延伸閱讀：
【台語世界／錄音】30年後台灣母語攏總死了了
【專文】評論徐佳青荒謬的母語觀

若欲投稿，請寄：binpotgb@gmail.com，文章字數 600-800。
請至【台語世界】閱讀更多相關文章。