頂幾日元宵節，雄雄接著阮查某囝ê電話，講伊tī馬來西亞，tng咧參加in ê元宵節活動，是一種叫做「拋柑仔」ê文化活動。阮查某囝”佩璇”tī馬來西亞ê『吉隆坡』作穡，頭尾有2年ah。三不五時會參與在地ê文化活動，通來融入in ê生活。佩璇若有拄著較特殊、較趣味ê代誌，攏會kah我分享。這擺看著chiah-nī新奇ê元宵活動，隨就敲電話轉來報我知。Koh問我講較早咱台灣，tī元宵節ê時，敢有啥物趣味ê民俗活動？
In（他們）馬來西亞hia，tī元宵節ê時，會舉辦一種親像「拋繡球」，hit種叫做「拋柑仔」ê文化活動。「拋柑仔」ê活動，是一陣年輕未結婚ê查某囡仔，提一粒柑仔，tī頂面寫名，對湖ê一pêng kā 擲--落去，另外一pêng有一陣未結婚ê少年查埔，就攑網仔來hô͘柑仔；這種活動是欲製造未婚男女熟似ê機會，也是早前創造好姻緣ê一種方式。真有人情味ê款式，koh有情人節ê內涵。真正值得來保留，kā當做一種文化活動來推展，應該算真有特色。聽講到chit-má，koh會kā電話號碼、FB ê數號、Line ê ID、QR code，chia-ê現代ê溝通工具，攏寫寫tī柑仔面頂。真正是一種進化版ê文化活動，tòe社會ê時勢咧行，koh加一點仔娛樂ê氣氛，khêng-si̍t真予人會o-ló--chit。
講到chia，予我想起咱台灣，tī元宵節ê時，嘛有真豐沛ê民俗活動。只是攏無咧推廣，真濟人毋知影niā-niā。像講元宵節暗暝ê「跳菜股，娶好某。偷挽蔥，嫁好翁。」，嘛是一種真有意義ê民俗活動。會當予少年一輩，了解早前老iân--ê，in男女之間熟似ê過程。咱kā想看覓，一陣無娶某ê少年家，去到菜園咧跳菜股；koh有一陣猶未嫁翁ê查某嬰仔，去菜園咧挽蔥。Tī十五暝kng-iàⁿ-iàⁿ ê月娘下跤，規大陣未婚男女，攏tī菜園仔內，tī遮爾有lo͘- bán -tih-khoh ê氣氛下面，會擊出啥物火星，真正予人誠期待。
Koh有，聽講斯當時，較大方ê查埔查某，若是看會chiūⁿ目，就會當相招去賞花燈、臆燈謎，順紲約會kâⁿ散步。若是較閉思--ê，就轉去叫阿母揣媒人婆仔去講chhin-chiâⁿ，按呢成就真濟好姻緣。這敢毋是真好ê文化活動。這種元宵活動，會當予chit-má ê少年人知影，早前咱頂iân--ê，in男女之間熟似ê上好機會，就是tī元宵暝，雖然元宵節無「情人節」之名，煞有「情人節」之實。Siáng講台灣人無lo͘-bán-tih-khoh？Siáng講台灣人無「情人節」？為啥物無欲kā這種傳統活動好好仔保留koh推sak--落去？
【台灣字（白話字）版】
Bô Kâng-khoán ê Goân-siau-cheh Oa̍h-tāng
Bûn, lo̍k-im／Kang, Têng Chhiū（Tâi-tiong-chhī Kok-an Kok-sió Tâi-gí kàu-su）
Téng kúi-ji̍t Goân-siau-cheh, hiông-hiông chiap-tio̍h goán cha-bó͘-kiáⁿ ê tiān-ōe, kóng i tī Má-lâi-se-a, tng-leh chham-ka in ê Goân-siau-cheh oa̍h-tāng. Sī chi̍t-chióng kiò-chò “phau-kam-á” ê bûn-hòa oa̍h-tāng. Goán cha-bó͘-kiáⁿ “Pōe-soân” tī Má-lâi-se-a ê Kuala Lumpur choh-sit, thâu-bóe ū 2 nî--ah. Sam-put-gō͘-sî ē chham-ú chāi-tē ê bûn-hòa oa̍h-tāng, thang lâi iông-ji̍p in ê seng-oa̍h. Pōe-soân nā ū tú-tio̍h khah te̍k-sû, khah chhù-bī ê tāi-chì, lóng ē kah góa hun-hióng. Chit-pái khòaⁿ-tio̍h chiah-nī sin-kî ê goân-siau oa̍h-tāng, sûi tio̍h khà tiān-ōe tńg-lâi pò góa chai. Koh mn̄g góa kóng khah-chá lán Tâi-oân, tī Goân-siau-cheh ê sî, kám ū siáⁿ-mih chhù-bī ê bîn-sio̍k oa̍h-tāng?
In Má-lâi-se-a hia, tī Goân-siau-cheh ê sî, ē kí-pān chi̍t chióng chhin-chhiūⁿ “phau-siù-kiû” hit chióng kiò-chò “phau-kam-á” ê bûn-hòa oa̍h-tāng. “Phau-kam-á” ê oa̍h-tāng, sī chi̍t tīn nî-khin bōe kiat-hun ê cha-bó͘-gín-á, the̍h chi̍t lia̍p kam-á, tī téng-bīn siá miâ, tùi ô͘ ê chi̍t pêng kā tàn--lo̍h-khì. Lēng-gōa chi̍t pêng ū chi̍t tīn bōe kiat-hun ê siàu-liân cha-po͘, tō gia̍h bāng-á lâi hô͘ kam-á. Chit chióng oa̍h-tāng sī beh chè-chō bī-hun lâm-lú se̍k-sāi ê ki-hōe, iā-sī chá-chêng chhòng-chō hó in-iân ê chi̍t chióng hong-sek. Chin ū jîn-chêng-bī ê khoán-sek, koh ū “chêng-jîn-cheh” ê lāi-hâm. Chin-chiàⁿ ta̍t-tit lâi pó-liû, kā tòng-chò chi̍t chióng bûn-hòa oa̍h-tāng lâi chhui-tián, eng-kai sǹg chin ū te̍k-sek. Thiaⁿ-kóng kàu chit-má, koh ē kā tiān-ōe hō-bé, FB ê siàu-hō, Line ê ID, QR code, chiah-ê hiān-tāi ê ko͘-thong kang-kū, lóng siá-siá tī kam-á bīn-téng. Chin-chiàⁿ sī chi̍t-chióng chìn-hòa pán ê bûn-hòa-oa̍h-tāng. tòe siā-hōe ê sî-sè leh kiâⁿ, koh ke chi̍t-tiám-á gô͘-lo̍k ê khì-hun, khêng-si̍t chin hō͘ lâng ē o-ló--chit.
Kóng kàu chia, hō͘ góa siūⁿ-khí lán Tâi-oân, tī Goân-siau-cheh ê sî, mā ū chin phong-phài ê bîn-sio̍k oa̍h-tāng. Chí-sī lóng bô leh chhui-kóng, chin chē lâng m̄-chai niā-niā. Chhiūⁿ-kóng Goân-siau-cheh àm-mê ê “Thiàu chhài-kó͘, chhōa hó bó͘. Thau bán chhang, kè hó ang.”, mā sī chi̍t chióng chin ū ì-gī ê bîn-sio̍k oa̍h-tāng. Ē-tàng hō͘ siàu-liân chi̍t-pòe, liáu-kái chá-chêng lāu-iân--ê, in lâm-lú chi-kan se̍k-sāi ê kòe-têng. Lán kā siūⁿ khòaⁿ-māi, chi̍t tīn bô chhōa-bó͘ ê siàu-liân-ke, khì kàu chhài-hn̂g leh thiàu chhài-kó͘, koh ū chi̍t-tīn iáu-bē kè-ang ê cha-bó͘ iⁿ-á, khì chhài-hn̂g leh bán chhang. Tī cha̍p-gō͘-mê kng-iàⁿ-iàⁿ ê goe̍h-niû ē-kha, kui-tīn bī-hun lâm-lú, lóng tī chhài-hn̂g lāi, tī chiah-nī ū lo͘-bán-tih-khoh ê khì-hun ē-bīn, ē kek-chhut siáⁿ-mih hóe-chhiⁿ, chin-chiàⁿ hō͘ lâng chiâⁿ kî-thāi.
Koh ū, thiaⁿ-kóng su-tong-sî, khah tāi-hong ê cha-po͘ cha-bó͘, nā-sī khòaⁿ ē chiūⁿ-ba̍k, tō ē-tàng sio-chio khì siúⁿ-hoe-teng, ioh-teng-bê, sūn-sòa iok-hōe kâⁿ sàn-pō͘. Nā-sī khah pì-sù--ê, tō tńg-khì kiò a-bú chhōe mûi-lâng-pô-á khì kóng chhin-chiâⁿ, án-ne sêng-chiū chin chē hó in-iân. Che kám m̄-sī chin hó ê bûn-hòa oa̍h-tāng. Chit chióng goân-siau oa̍h-tāng, ē-tàng hō͘ chit-má ê siàu-liân-lâng chai-iáⁿ, chá-chêng lán téng-iân--ê, in lâm-lú chi-kan se̍k-sāi ê siōng hó ki-hōe, tō-sī tī goân-siau-mê. Sui-jiân Goân-siau-cheh bô “chêng-jîn-cheh” chi miâ, soah ū “chêng-jîn-cheh” chi si̍t. Siáng kóng Tâi-oân-lâng bô lo͘-bán-tih-khoh? Siáng kóng Tâi-oân-lâng bô “chêng-jîn-cheh”? Ūi-siáⁿ-mi̍h bô beh kā chit chióng thoân-thóng oa̍h-tāng hó-hó-á pó-liû koh chhui-sak--lo̍h-khì.
讀hōo你聽：
專欄屬作者個人意見，文責歸屬作者，本報提供意見交流平台，不代表本報立場。
