當庄裡有囡仔逮喝（tè-huah）："青瞑仔（tshenn-biân-á）！青瞑仔！"--ê時，規陣細漢gín-á就倚倚（uá-uá圍近）來看一個八九歳ê查某gín-á用一支竹棍仔牽伊老父行入庄頭來。青瞑仔扞（huānn手按）竹棍仔彼隻手同時也提一塊柴板做木魚。伊沿路行沿路觳（iân-lōo-kiânn iân-lōo-khok 註1），發出：khok！--khok！的聲音。欲予人（beh-hōo-lâng 註2）知影算命仔來也。規陣夭壽（iáu-siū 註3）gín-á就喝（tiō-huah）：＂牽青瞑仔濌（lop 註4）牛屎！牽青瞑仔濌牛屎！＂這位可憐ê查某gín-á愛牽老父出來各庄頭逝（sē遶）來逝去就已經真痛苦真無奈也。聽着規陣gín-á焉呢（ian-ne 如此）喝，伊就受氣到欲流目屎。這時頭前拄好（tú-hó剛好）有一垺（pû 註5）牛屎，伊就真正老父牽咧kā牛屎濌落去！老父哞真有度量，知影家己查某子（kiann）是予這陣gín-á激到（kik-kàu）tē受氣。伊就來自我排解講：＂濌牛屎較贏目睭予牛屎糊（kôo）去！＂意思是伊雖然目睭無看，但是抑會當（iah-ē-tàng 註6）行路也算是好運幸福ê！規陣gín-á聽着就哈哈大笑！
人講青瞑精啞口靈（é-kau-lîng 註7）！這位青瞑仔不但會曉騎鐵馬，哞會曉用刜刀（phut-to 註8）刜田岸（phut-tshân-huānn）。伊騎鐡馬時需要一個細漢gín-á坐置頭前櫳桿仔（lông-kuáinn-á 註9）共伊指路，講叨位正斡叨位倒斡（tò-uat左轉），叨位跋懸（pua̍h-kuân爬高）叨位跋低。青瞑仔加人（ka-lang）算命是用 「卜鳥仔卦（pok-tsiáu-á-kuà）」的。伊隨身帶一隻 「文鳥（bûn-niáu）」置鳥籠仔內。這隻文鳥飼到乖乖袂飛走去。佇ka-lâng算命時就予文鳥徛蹛手甌仔底（khiā-tuà-tshiú-au-á-té 註10），另外一手提一褶（tsih）紙籤。這時訓練有素ê文鳥就會跳過來用啄筆抽一張紙籤出來。算命仔紙籖提咧就共籤文唸出來。根據籤文來解釋（kái-sik）欲算命者ê氣數運命（khì-sòo-ūn-miā）kah指津解運（tsí-tin-kái-ūn）ê歩法。青瞑算命仔會將差不多二十張紙籤頂面ê籤文記咖清清楚楚。同時會知影抽出來彼張ê籤文是啥物。這是無簡單ê代誌！
伊查某子踨（tuè跟）老父各地拋拋走（pha-pha-tsáu 註11）kā人算命，就若像置學堂（o̍h-tn̂g）學習（ha̍k-sı̍p）仝款。幾年內底也學捌（o̍h-bat學懂）了種種人情義理ê常識kah天文地理ê學問。有一年ê元宵暗（guân-siau-àm）兩父也子（nn̄g-pē-ā-kiánn）來到一个庄頭ê廟裡拄著是猜燈謎ê時陣。有一个燈謎是：頂頭一粒柑、下面一支燈心、接落去一面鏡、一塊糕仔；最後囥（khǹg放置）兩个銀角仔！這個燈謎難倒所有ê人，到半暝ê時陣抑無人猜會出謎底。牽青瞑仔ê查某gín-á這時腹肚枵（iau餓）甲飢咕叫（ki-kū-kiò）。看着彼塊芳片糕（hong-phiàn-ko）就真擋袂牢，緊緊衝晉前去。伊將彼面鏡kā擘破（peh-phuà剝破），喙講：＂甘心擘破面，愛糕仔兩個銀！＂伊隨手kā彼塊糕仔提來窒（that 塞）入去喙底，二個銀角仔囥入去袋仔內。回頭kā老父牽咧離開廟寺行對（kiânn-tuì走向）家己庄頭去。全廟內ê人料想袂到一位細漢查某gín-á有遮大（tsia-tuā 註12）的才華將謎底猜出來，大家徛宁遐裡愣愣（khiā-tuà-hia---lí gāng-gāng 註13）看伊父也子行離開。所發生ê代誌就置各庄頭傳開。以後查某gín-á hām青瞑老父再到各庄頭時，圍宁邊仔ê gín-á-tîn無閣喝："牽青瞑仔濌牛屎！" 大家大聲嚷（jiáng）：＂甘心擘破面，愛糕仔兩個銀！＂tse-ian-ne自庄頭嚷到庄尾，自頂庄嚷到下庄。予這個查某gín-á擋袂牢來精神分裂。有一日行到十縫仔水門（tsa̍p-phāng-á-tsuí-mn̂g 註14）時伊雄雄（hiông-hiông猛然）來跳落水沖窟（tsuí-tshiâng-khut 註15），結束了伊短短（té）的生命！
註：1．邊走邊敲；2．好給人；3．不懷好意；4．踩踏進入；5．球狀堆物；6．還可以；7．啞，巴的人靈活；8．長柄砍刀；9．腳踏車座位前鐡杆子；10．站在手心窩裡面；11．拋頭露面各處走來走去；12．這麼大；13．站在那裡愣愣的；14．有十個閘門的水閘；15．閘門大水沖出的大水窩
（修訂版，原文刋訂置美國南加州太平洋時報的〈七崁客專文〉）
文章屬作者個人意見，文責歸屬作者，本報提供意見交流平台，不代表本報立場。
