是按怎欲揀這篇：
「文、白論戰」經過個外月ê滾絞，文言文ê比例總算降低--ah。若考慮本土語言ê發展，又koh應該按怎看待文言文？凡勢，lán ē-sái uì仝屬「漢字文化圈」ê日本、南韓ê作法，得著一寡開破啟發。Lán，lóng iáu tī語文教育改革ê路--裡。
最近tsiah發生「文言文」kap「白話文」ê爭議，足tsē台語界人士mā跳出來贊成增加白話文ê比例，hōo我感覺無妥當。因為橫直中華民國教育體系所講ê「文白之爭」是中文ê問題，就算講beh增加白話文，kan-na是beh增加現代中文ê比例，無可能ke囥台語文，顛倒hōo台語ê機會愈kiu--去。咱tio̍h-ài去檢討--ê，是ùi台灣主體性ê觀點來看「文」kap「白」án-tsuánn界定ê問題。
我beh來講hām台灣仝款屬漢字文化圈（Hàn-jī Bûn-huà-khuan）ê日本kap南韓，按怎確立獨立語文系統ê經驗，hōo逐家參考。
南韓雖然是普通時仔khah少teh用漢字ê國家，m̄-koh高中課程內底teh教ê「漢文」，一半以上是用in朝鮮（Tiâu-sián）民族家己李朝時代ê人所寫ê漢文、漢詩，差不多四成是《論語》等古早China ê漢文、漢詩；這，也就是中華民國所講ê文言文。
日本是tsit-má有teh保留漢字ê國家，mā kā中華民國體制所講ê「文言文」叫做「漢文」，是「國語（就是日語）」課程內底ê一部份，uì國中開始教。國中第一年教「矛盾」等成語，第二年杜甫（Tōo, Hú）〈春望〉，第三年《論語》短句，到高中teh教蘇軾（Soo, Sik）〈赤壁賦〉、白居易（Pe̍h, Ki-i̍k）〈長恨歌〉等。 「漢文」ê題材攏用古代China--ê。Tī日本，「古文」有兩種：一種是「漢文訓讀文（Hùn-tho̍k-bûn）」（註一），另外一種是以《源氏物語》為首--ê、主要用ひらがな（平假名）來寫ê「和文」。
Uì日本kap南韓ê經驗來講，tsit-má所講ê「文言文」、「白話文」是啥物uánn-ko--leh？其實中華民國ê「文言文」應該是「用現代北京音來讀ê漢文（抑是「古漢文」）」，中華民國ê「白話文」是「徛tī現代北京官話ê文法來寫ê華語文」。Uì現此時有足tsē台語族群ê人「喙講台語、手寫華文」ê情形來看，中華民國ê「白話文」變做台語族群事實上ê 「文言文（書寫系統）」--ah。
M̄-koh這無表示講，中華民國ê「文言文」是in中國--ê，咱tio̍h-ài完全kā排斥。因為孔子（Khóng-tsú）、老子（Ló-tsú）、杜甫、李白（Lí, Pi̍k）ê時陣無「中國」hit-ê國家，in寫ê漢文、漢詩，mā總是東亞漢字文化世界共同ê資產；mā因為án-ne，日本kap南韓iáu-koh有teh教漢文、漢詩。
台語kap台灣客語攏有文白異讀，古早ê漢學仔抑是日本時代ê台灣智識份子，攏用台語抑是客語ê文言音、讀冊音來讀古漢文，絕對m̄是用中華民國「國語」來讀！所以，最近tsiah發生「文言文」kap「白話文」ê爭議，應該tio̍h用日本kap南韓ê經驗，抑是用台灣本土ê歷史膜脈（mo̍oh-me̍h），重新去思考ê代誌。
讀予你聽：
（作者是日本學者，專門研究台灣政治、台灣語言政策、台語文學ê政治分析等，目前tī成大台文系做客座副教授；本文由台灣羅馬字協會提供。）
註一：「漢文訓讀文」ê意思就是「kā漢文按日語詞序改寫ê文章」。比如，韓非子（Hân-hui-tsú）「楚人有鬻盾與矛者」，用訓讀文讀做「楚人に盾と矛とを鬻ぐ者有り（そじんにたてとほことをひさぐものあり）」。
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
・大逆轉！課審會重新表決，文言文比例下降至35～45%（關鍵評論）
・文言台語也是我个爸母話在內（潘科元面冊）
・【台語世界／錄音】法國、越南kap韓國對語言運動者ê啟示（上）、
・【台語世界／錄音】法國、越南kap韓國對語言運動者ê啟示（下）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
