是按怎beh揀tsit篇：
囡仔對語言ê學習能力tsiok強，tse是天生自然--ê；大人beh提供啥mih款ê語言環境hōo--in，就是lán人ê選擇--ah。家長驚囡仔輸tī起頭，其實是ke煩惱--ê，koh再講，國際化無代表英語化，koh-khah m̄是華語化，lán tio̍h對家己ê語言有信心，hōo囡仔來傳承。
最近一條新聞講，一个Cambodia（『柬埔寨』）Angkor Wat（『吳哥窟』）咧賣紀念品的查埔囡仔，會曉用足輾轉的十幾國的話，鼓舞去遐耍的人買伊的物件。我看著新聞的影片，實在有夠佩服--的，因為伊毋是硬背--的，是真正用人客的話對談、有感情、有思考--的。
伊穿一領舊舊的衫，看--起-來是散赤人囝，莫怪tio̍h出來huah賣。伊ná變色的杜定仝款，ná行ná kā人客推銷伊的物件，眼神足有自信。斯當時，人客刁工講一句法語試探--伊，伊無咧驚。人客直kā出題，伊紲咧講無仝國的語言，袂輸咧答喙鼓，華語、英語、法語、廣東話、日語、韓國話、泰國話、德語、西班牙語、馬來語佮菲律賓語，我算算--咧加上在地的Khmer（『高棉語』），攏總有12種語言，攏考伊袂倒，可見這个囡仔人的語言能力有偌強。網路頂有人講「有夠厲害，受我一拜」、「根本就是上快速的翻譯機」、「巧甲予人足毋甘，愛kā分來飼」、「來幫助伊讀冊」，嘛有人講「環境所逼，才會變遮強」、「咱的囡仔傷好食睏」──我嘛有仝款的感覺，毋過有ke想著一寡關係台語的代誌。
伊哪會無學著台語？敢是台灣傷細國，佇國際頂無人要意？定定聽著足濟人去Angkor Wat耍，敢講台灣人去到世界各地方，無半个仔欲講台語？人講「家己的語言家己救」，向望台灣人去到佗位攏毋thang歹勢，愛慣勢kā母語講出喙。有講才有機會予人了解咱的語言，毋thang藏--起-來，抑是kā咱台語的田園放咧拋荒。特別是做人老師、爸母、阿公、阿媽--的，若有機會愛足有自信、足歡喜來佮學習能力tng旺的囡仔講台語。
人講「家庭是一切的根本，社會是問題的呈現，學校拄好佇中央。」學校會當補家庭做無夠--的，會當tshuân囡仔日後佇社會用會著--的。六歲、十二歲進前的囡仔ná海綿仔--咧，是學語言的好時機，教啥就有啥，教偌濟就學偌濟。美國的語言學者Noam Chomsky講，「所有的囡仔攏有足強的學習語言的能力，會當佇拄開始彼幾冬用上緊的速度吸收幾若種語言。」咱台灣的家庭較無咧教台語，好食睏的囡仔嘛毋知二三十歲的時台語佇khang-khuè上的重要，所以無人會主動學習台語。社區的家長嘛看無遠，無了解「ke學一个語言，ke一粒頭殼，ke一種紮會走的能力，ke一支拍開世界、行入國際的鎖匙」。
學本土語言是對土地的認同、對無仝族群的尊重佮欣賞、嘛會當增加能力、機會佮生活趣味。等到囡仔二十幾歲大學出業欲揣頭路的時，「人來才tsuann茶」，死背、硬背會袂赴市！「重素養」的十二年國民教育，無佇囡仔六歲進前讀的幼兒園釘根，閃過學台語的好時機，實在tsiânn拍損。小學階段一禮拜有一節課，「無魚，蝦嘛好」。只是厭氣--啦！毋知啥人計畫--的，無對國中延伸，小學學--的尾--仔攏還轉去予老師--矣。
未來是多元化、非典型的世界，只要是好--的、無違反法律--的，咱人毋thang畫圓箍仔關家己。新時代愛有多元開放的認知、習慣佮能力。咱若真正愛台灣，真正為台灣囡仔想，欲予in國際化，教華語好，教英語好，教本土語言嘛攏好。有「認同」才有「自動自發」；有「尊重」才有「溝通互動」；有「欣賞」才有「社會參與」、「合作共好」。可見「認同、尊重、欣賞」是本土語言上根本的所在，用伊來建立十二年國民教育「自發、互動、共好」的素養，嘛才有正港的幸福、快樂。
讀hōo你聽：
（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【台語世界／錄音】用台語予世間人知影咱是台灣人
・【台語世界／錄音】Uì Ganga到高屏溪，我kap土地ê對話
若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
