是按怎beh揀tsit篇：
跨代共居，就是頂下沿做伙蹛，thang互相照顧。本文作者講，無仝世代ê交流，hōo老大人動頭殼，預防食老記持bái，少年人beh生囝mā有人tàu騙，siāng時解決現此時「少囝化」、「高齡化」ê國家危機，實在是一兼二顧neh！
這幾冬社會因為少囝化佮高齡化的影響，人的想法、生活習慣佮政府的政策攏有綴咧變。佇學校教冊，古早一班五十二个學生，這馬賰無一半，以前希望小班教學，這馬足懷念過去「濟人濟福氣」的鬧熱。另外，醫學發達、生活水準提懸、全民健保有保障，平均活命超過八十歲，未來一个少年--的愛飼幾若个老人。若少年有拍拚、食老較好過--的就較袂拖身命，錢銀纏半腰，就免驚銀紙無人燒；毋過，艱苦人猶是較濟。國家為著欲予老大人攏有基本tik的生活，tio̍h發展福利政策；若無，2026年咧欲發生的超高齡問題，會佮少囝化絞絞做伙。
以我這个老百姓來講，面對這兩个社會危機，上濟是鼓勵家己的囡仔、學生佮親tsiânn的少年家，緊嫁娶、緊生囝。毋過講to咧講，huah to咧huah，有喙講甲無瀾，嘛是無人聽。學生內底生一个--的，叫伊閣生講毋敢，因為趁少開濟，tsih載袂牢。少年--的毋敢結婚，若結婚--的毋敢生--啦。我只好轉念，上無愛共半ló老--矣的家己顧予好勢，以後絕對袂當變做拖累國家的人，愛老甲勇健閣優雅，毋thang無彩囡仔佮國家的錢啊！
人共半ló老五十歲叫做「柑仔色世代」，事業到一个坎站，囝兒序細離跤手，算是人生的收成，ná像柑仔黃金黃金、豐收、飽滇的感覺。欲按怎做，才袂變做漚柑仔thûn規籠--咧？欲按怎過一个健康、獨立、自由、自在、優雅的生活--咧？──愛「承認老」，嘛愛「無承認老」。
愛有「承認老」的理智，知影老毋是tài身命，是hām當初「青春轉大人」仝款的自然現象，老就會較慢鈍，做代誌毋thang閣兇兇狂狂。食物件袂當iau虎sà，食好、食巧（khá）毋thang食傷過飽，食甲漲腹肚的『百匯』就mài閣去--矣--啦！Ke食無補，làu屎就艱苦。穿插的部份，懸踏鞋仔收--起-來，改穿布鞋會當一兼二顧，隨時去散步閣袂跋倒。蹛的徛家上好是揀交通利便、有車幫thang坐、倚病院的所在，較袂去共少年--的閘著麻煩。老人欲四界行，坐車上四序（sù-sī），若有少年--的讓位嘛免歹勢，慈愛的老大人愛笑bi-bi。行路跤步tio̍h-ài看予好勢，踏予穩，老人驚跋，骨若tsi̍h--去，仙鬥to鬥袂bā--啦！老人上寶貴--的是智慧，毋過少年人的世界嘛有伊的道理。忍--咧，恬恬仔看，mài先開喙，家己才袂厭氣，少年--的嘛才會接受--你。娛樂的部份，講較實在--的，朋友註定會愈來愈少，上慘是會隨个仔隨个無--去。所以，毋thang閣佮人結冤仇--矣，若過去是冤家，上好是原諒再原諒，若有需要就緊共人會失禮，和和氣氣、歡歡喜喜，啥人先去做仙是袂按算--得。
老罔老，上好是愛有一粒「無承認老」的心情。食一歲學一歲，學家己興趣--的、老歲仔做會來--的、時間袂傷迫--的，因為有出去佮人tsih接，會當交朋友、疏筋活血、揣著人生的意義。頭殼有咧動，心情會較輕鬆，嘛會當預防食老記持䆀抑是傷早失智。日--時有代誌thang無閒，暗時毋才睏會去。欲有青春的心，嘛會當試看覓仔佮少年兄做朋友，欣賞in的創意、聽in的音樂、講in的笑詼──這款「無仝年歲的友情」，嘛算是做功德佮對少年人的牽成，因為老--的老步定，少年--的會當對你遐學著解決問題的撇步；愛佮老人開講的少年家，想法會較正面、情緒會較穩定，都合若拄好，閣會當佮老大人學台語，真正是好空的代誌！
這馬「跨代共居（hānn世代做伙蹛）」tng時行，是揣一寡無血緣的少年家來做老大人的厝跤，予少年--的省錢，老歲仔家己嘛會當ná ke一个孫仔。閣有一个技巧，就是會當做伙解決少囝化佮超高齡化的危機，就是真正佇厝鬥騙孫，予少年--的敢生囝，予家己看著幼囡仔親像puh穎的草仔，有活--落-去的希望佮趣味--啦！
讀hōo你聽：
（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【台語世界／錄音】婦jîn人作穡、生囝率雙低 三十三國台灣押後
・【台語世界／錄音】長照法ài注重「語言」ê尊嚴kap權益
若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
