【台語世界／錄音】是「思雙姬」毋是「思想起」

是按怎欲揀這篇：
Lán tiānn leh講「語言是文化ê載體」，若準對在地ê語言無熟，leh研究台灣民俗文化ê時，定著ē有資訊落勾--去，致使有錯誤ê理解。是按怎民謠「思想起」應該是「思雙姬」tsiah tio̍h？Hōo本文作者tshuā lán uì台語語音ê線索tshiau揣答案。

回想彼个kan-tann思想就會有罪的年代，台灣的民間藝人並無啥物自主權，外來的國民政府想欲加深殖民的效果，就抾咱民間的文化國寶，來疏通軍中老兵思鄉的情緒，兼會使繼續kā咱台灣本土的人民洗腦──連現此時對岸的中國mā知影，這真正是誠好用的文化統戰工具。當然，對彼个年代的記載kah資料中，加減會予咱聽著真濟性命的無奈kah聲音的感動，其實這mā是一種錯誤的美麗。

「思想起」的原始歌名就是「思雙姬」，mā有人寫做「思雙枝」kah「思雙居」。這是彼時陳達先生到台北駐唱，我佇歌廳無意中聽--著，邀請伊的人親喙留--落-來的講法；而且「思雙姬」的歌名有符合歌詞內底的意境，親像「甘蔗好食伊就雙頭甜」、「大某娶了伊就娶細姨」、「細姨仔娶--來是人人愛」，毋過重點是「放捒大某伊就上可憐」、「阿君仔講話若有影」、「刀槍來做路mā敢行」。雖然伊唱「思雙姬」，毋過就是叫人千萬毋通「思雙姬」！顛倒是「思想起」的歌名無啥合歌詞的意思，就連陳達--仔唱歌，一開始的發音mā是「su-á-siang-á-ki（思仔雙仔姬）」，毋是「su-á-sióng-á-khí（思仔想仔起）」，單純的發音已經來kā印證。

四、五十年前，是咱人民創作的歌曲會予人烏白禁的時代；人民若有想欲駐唱kah出唱片，一定是愛經過「警備總部」嚴格的審查。想mā知影，若是用「思雙姬」原來的歌名來書寫、稱呼，欲哪有可能予「警總」批准！毋過小可變竅、改用華語「雅化」，kā改做「思想起」，就有較符合過去殖民政府的意識形態，thang予in用來洗咱百姓、人民的腦（伊想欲愛咱思念tiàu遠的中國故鄉）──莫怪到現此時對岸的中國政府，mā會kā抾起來統戰咱台灣。Koh再講，佇彼時目睭已經強強欲失明--去的陳達老先生，伊欲哪有啥物kā反抗的能力，伊kan-tann會使偷偷仔叫人、想辦法kā歌曲真正的原始名稱留--落-來，然後逐擺錄音kah現場演唱，一定是唱足標準的「su-á-siang-á-ki」的發音，這mā表示講聽著歌聲的人，伊mā愛鬥記錄kā流傳--落-來--啦！

現此時，這塊上傳統的民謠「思雙姬」，雖然咱會當用月琴來自彈、自唱，結果煞毋知影原始歌名的起心動念是啥物，kah陳達老先生為啥物堅持用正確發音的苦心。我想，咱應該予逐家知影原始的歌名，並毋是過去外來的殖民政府kā咱洗腦所講的「思想起」，mā愛去了解彼个時代的真實面貌。真實就是真實，毋免驚講歌名敢有啥物「不雅」，「思雙姬」就是「思雙姬」。

讀予你聽：

（作者是台灣母語聯盟理事；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】四界「陳」的祖師廟鐘鼓樓落成儀式
・【台語世界／錄音】全台語ê「搬戲人生」

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。