台灣人ê政治覺醒，ùi 1920年代ê「台灣是台灣人ê台灣」開始，經過1947年ê「228屠殺」，到1979年先鎮後暴ê「美麗島事件」，攏總行beh 60年，才有真正ê認bat：「有抵抗才有人權、有行動才有主權」！
Taⁿ，經過40年ê「政治文化維新」，咱有今á日ê民主、自由、文明kap法治。Hō͘全世界lú來lú肯定咱ê成就，mā lú來lú對咱有國際認同！M̄-kú 咱ê民主猶koh無kài在穩、自由hō͘人操弄、文明無夠理想、法治mā猶有真濟khang-phāng。Koh-khah恐怖--ê是，國內ê政黨竟然勾結對面ê敵人隨時beh kā咱拆食落腹！
今年是美麗島事件40週年，台灣南社kap守護台灣大聯盟、台灣基督長老教會、台灣社等本土團體舉辦40週年遊行kap祈禱，mā有邀請真濟斯當時美麗島事件ê當事人來kā咱復習事件ê經過，包含總統府祕書長陳菊、前考試院長姚嘉文等等，kap來kā咱講應該按怎繼續保守咱ê主權kap民主自由！
12月初7 下晡2點開始，tī高雄市中山路kap大同路口，捷運美麗島站2號出口。敬請大家食飽趁gâu早，樓頂招樓腳、阿母chhōa阿爸，相招來鬥鬧熱，守台灣、護民主！台灣出頭天！
感謝！Ló͘-la̍t！An-chu-se。Malimali masalu！
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
