​【台語世界／錄音】唱家己的歌

是按怎beh揀tsit篇：
Lán tī仝一phiàn土地生湠，一代過一代，自本有無仝ê文化、無仝ê語言，m̄-thang勉強家己去學別人講話。獨尊「國語」ê政策tann已經過--去，lán tio̍h去tshiau揣家己ê文化、kā家己ê語言khioh倒tńg--來。

佇咧一phiàn樹林仔內底，有無仝款的鳥仔。有大隻鳥仔，嘛有細隻--的。有豆仔鳥媽媽、粉鳥媽媽，猶閣有粟鳥仔媽媽。最近，除了有幾隻粟鳥仔媽媽以外，猶閣有一隻豆仔鳥媽媽，看--起-來攏欲生卵--矣。彼日，欲生卵的粟鳥仔媽媽開始咧做岫。In愛趕緊共鳥仔岫做好，按呢才有所在thang生卵、pū卵、晟養粟鳥仔baby。彼隻豆仔鳥媽媽嘛欲生卵--矣，毋過伊煞歇佇咧邊--仔的樹ue偷看粟鳥仔媽媽in做岫。真緊，粟鳥仔媽媽in攏已經共岫做好--矣，會當準備來生卵。每一隻粟鳥仔媽媽khû踮岫內，Pû！Pû！Pû！Liam-mi生卵--出-來。粟鳥仔媽媽想講既然卵生完--矣，紲--來thang pū卵--矣。佇咧pū卵進前，粟鳥仔媽媽先飛去揣看覓有啥物蟲thang食，抑是有樹葉仔、樹枝thang予伊提轉來做岫，予in囡仔蹛較四序（sù-sī）。豆仔鳥媽媽一直佇咧邊--仔的樹ue偷看，伊趁遮的粟鳥仔媽媽飛去揣蟲食的時tsūn，偷偷飛去in的岫內，佇每个岫內底生一粒卵，生完就趕緊飛--出-去。

其中一隻粟鳥仔媽媽飛轉來伊的岫的時tsūn，感覺真奇怪。伊會記得佇咧伊飛--出-去進前，明明是三粒卵，為啥物倒轉--來煞變四粒卵？而且，彼粒卵閣比其他三粒卵較大？粟鳥仔媽媽伊嘛想無哪會按呢。伊較好心行（sim-hīng），想講無要緊--啦，平平攏是卵，就開始來pū這四粒卵--矣。粟鳥仔媽媽ná pū卵ná唱歌。過幾工以後，卵殼出現必巡，原來是卵內底的鳥仔囝咧tok殼欲出--來--矣！粟鳥仔媽媽足歡喜--的。雖然有一隻較大--的，看--起-來佮伊無成，伊嘛仝款共伊當做是家己的囝咧疼。粟鳥仔媽媽共in講：「Baby！媽媽欲出來掠蟲予恁食--喔！恁愛乖乖顧岫，等媽媽轉--來--喔！」鳥仔囝同齊（tâng-tsê）應好，閣叫媽媽愛細膩。

粟鳥仔媽媽飛--出-去了後，岫內較大隻的豆仔鳥就共三隻細隻的粟鳥仔講：「為啥物恁遮細隻啊？」粟鳥仔無共應聲。豆仔鳥就開始唱歌：「Pu！Kuh！Pu！Kuh！」伊認為伊的歌聲真好聽，就問粟鳥仔in唱歌是啥物聲。粟鳥仔in做伙唱：「Tsiuh！Tsiuh！Tsiuh！」聽--起-來嘛是真好聽。但是豆仔鳥煞講：「恁這種歌聲無好聽neh！我的歌聲才好聽。恁攏愛學我按呢唱。」粟鳥仔in講：「毋過阮本底唱歌就是按呢啊！」豆仔鳥毋聽，堅持愛粟鳥仔佮伊唱仝調，閣出手共粟鳥仔in tainn--一-下，一定愛粟鳥仔佮伊唱仝款的歌。粟鳥仔開始háu：「阮袂曉唱neh。」豆仔鳥就講：「袂使！恁一定愛佮我唱仝款的歌、講仝款的話。」粟鳥仔只好學唱：「Pu…Pu…，為啥物阮愛佮你講仝款的話？阮本來就佮你無仝款。」豆仔鳥真壓霸，伊講：「攏仝款！攏愛佮我唱仝款的歌、講仝款的話。」這三隻可憐的粟仔鳥予伊逼甲mà-mà-háu。粟鳥仔媽媽飛--轉-來的時tsūn，看著三隻粟鳥仔囝咧háu，就問in哪會咧háu。原來是豆仔鳥強迫粟鳥仔學伊講話、唱歌。粟鳥仔媽媽就共粟鳥仔囝講：「恁本來就是粟鳥仔，恁有家己的話佮家己的歌，就足好聽--的。無需要予人強迫講別人的話、唱別人的歌。」粟鳥仔媽媽嘛共豆仔鳥講：「雖然你毋是我親生--的，是因為豆仔鳥媽媽共你生佇遮。但是你嘛是我的囝--喔！咱愛和好，好好鬥陣。」

這个故事共咱講：咱愛了解家己是啥物人，講家己的話、唱家己的歌。毋thang因為別人的壓霸就袂記得家己是siáng，甚至感覺別人的話佮別人的歌較好聽、閣反倒轉來譬相家己的話佮家己的歌。只有知影家己是siáng，才會有真正的快樂。

讀hōo你聽：

（作者是台灣師範大學台灣語文學系副教授；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】Jiok日頭ê khang-khuè
・【台語世界／錄音】用台語予世間人知影咱是台灣人 

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。