是按怎欲揀這篇：
偏鄉ê教育問題ná來ná受社會看重，立法院mā tī本月初審通過相關條例。作者提出鼓勵在地師資ê路徑，hōo逐家來思考。其實，「偏鄉」是都市本位起造ê偏見。台灣tsit塊土地，鄉鄉鎮鎮有家己ê美麗；若有資源來沃肥，lóng thang開出文化ê花蕊。
10月25，立法院咧審查《偏遠地區學校教育發展條例》草案，罕得『藍的』、『綠的』的委員，攏變做咱台語講的「青--的」。逐家唱仝聲，攏咧激頭殼想講，欲按怎用服務幾冬的條件制限，來共老師留蹛偏鄉服務。毋過「豬頭毋顧，顧鴨母卵」，這無醫著偏遠師資的根本問題。
我有兩擺佇偏遠地區教冊、做行政的經驗。頭擺，是1992年，我拄對大學畢業。彼陣，無教育學分的人，會當直接考偏遠地區的正式老師。我予天公伯--仔安排，去到南投縣仁愛鄉，佇霧社台14甲線路邊的仁愛國中，閣兼教學組長、設備組長。工課是有夠忝，毋過風景媠、囡仔古錐。
我會記得口試的時，督學問我講：「若錄取，愛佇山頂抑是庄跤服務，愛照顧一寡歹命囡仔。敢會使？」我歡歡喜喜共講：「我嘛是散赤囡仔出身，知影欲按怎鼓勵囡仔。」考牢愛服務三冬，只要有心，我袂感覺這是一種限制。毋過老師嘛是人，我為著欲去都市讀研究所、為著欲嫁翁，落尾嘛是三年一到，就申請調離開遐，「師有心」嘛變做無奈的「有私心」。
第二擺，我是去到新北市烏來（U-lai）國中小做學校的學務主任。我冊教二十二冬--矣，心內一直感覺，愛共當初留職停薪、去讀研究所欠仁愛國中的兩冬還--人。彼陣，拄著2015年『蘇迪勒』災後重建的艱苦，一冬拄兩冬，還了，我嘛心安--矣。
佇遐，我捌一个在地--的、足優秀的原住民代課老師。彼冬，伊真有機會考牢高雄一間有限制愛蹛「六冬」的學校教職，伊煞放棄、無去考。知影的人攏講足無彩，伊講：「縛六冬，我是欲按怎為我的故鄉做代誌？」俗語講，「豬岫毋值狗岫穩，狗岫睏了燒滾滾」，伊今年考牢新北市的學校，雖然離烏來有一段路，毋過會當留佇故鄉，就是足幸福的代誌--矣。伊對故鄉的感情，予我足感動。
我做過五冬新北市本土語言指導員的工課，上山落海，都市、偏鄉走透透。有一个誠特別的體會：在地人袂感覺家己的故鄉偏遠，「偏鄉」是外來的人用家己的角度咧思考。在地的老師對社區有感情，教文化、教母語一下仔就熟手，教育辦--起-來當然較順序、捎有摠。
所以我認為，偏鄉的師資若欲穩定，政府愛佇遐開公費師範學生缺（khueh）、鼓勵偏鄉用在地的老師，才是上好的辦法。無，「掠蜂毋做蜜，掠人毋作穡」，遐的毋情毋願留--落-來--的，縛一百冬嘛仝款，有魂無體烏白教，會害死偏鄉的囡仔。總講--一-句，教育的成敗佇師資，毋過「有私心」是人性，應該愛想辦法予「師有心」。
讀予你聽：
（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・教育部對初任偏鄉教師服務年限延長ê說明（教育部官網）
・偏鄉找「專聘教師」卻要求教師證，還有「不山不市」的學校你聽過嗎？（關鍵評論）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
