【台語世界／錄音】政大校歌新詞 kā『實行三民主義』、『吾黨』刣掉

是按怎欲揀這篇：
血淚歷史踮lán ê身軀頂留落來威權ê跤跡，tsia-ê「屎尾」tī追求「轉型正義」ê現此時，lán beh按怎看待？政大ê做法，檢采ē-tàng參考：『黨國萬歲、校歌無罪』ê舊詞留--leh，m̄-koh mā有「民主法治、自由人權」ê新詞thang選擇。

國立政治大學9月初7召開「2017學年度第一擺校務會議」，針對檢討目前校歌建議方案，接suà討論賰ê兩句歌詞，會議代表lóng齊全表達意見kap討論了後，表決通過新詞，kā原本ê『實行三民主義』、『吾黨』、『建設中華民國』刣掉，改用『實踐民主法治』、『我們』、『維護自由人權』。新詞確定了後，未來政大ê校歌beh tī國內大學行代先，起造「新、舊詞並平行（pīng-pênn-kiânn）」ê頭例。

政大校歌tī 1940年年底創作，hit-tsūn iáu是伊ê前身「中央政治學校」；由作曲家李抱忱（Lí Phāu-sîm）寫曲，當年ê教育長，mā是中國國民黨大老（tuā-ló）陳果夫（Tân Kó-hu）寫詞。Íng-kuè政大就bat hông質疑「黨國色彩」khó-khó-khó，校歌內底ê『三民主義』、『吾黨』等字目就thang看清伊ê歷史源頭，hōo一寡校友kap師生翻頭思考，希望ē-tàng修正、調整，m̄-koh mā有bē少校友激硬反對。

政大初7下晡發佈新聞稿表示，因為進前校務會議已經無異議通過保留原校歌，「未來，原校歌kap新詞兩條歌並平行，tsiânn做kā政大人khoo做伙ê力量，所有政大人照伊佮意--ê、lóng thang鬥陣唱校歌。新詞是由傳播學院院長林元輝招組「檢討現行校歌委員會」，經過意見徵詢、會議討論決定beh「保留原校歌、增訂新詞」，tsiah陸續完成逐句ê修訂。

政大表示，校歌第七句原歌詞『實行三民主義是吾黨的使命』，校歌委員會建議ê「箭靶（tsìnn-pé）歌詞」（『靶子歌詞』，kap原版囥做伙ê新詞提案）是『實踐民主法治是我們的使命』（實踐民主法治是lán ê使命）。會中有代表建議，法治範圍khah狹，改做實踐民主「憲政」khah周至；另外有代表提出用『推動國家發展』來取代，範圍koh-khah闊。M̄-koh新提出ê兩案表決lóng無通過，尾--à tsit句ê箭靶歌詞以贊成五十七票、反對一票通過。

Ah若校歌第八句原歌詞『建設中華民國是吾黨的責任』，政大表示，箭靶歌詞方案是『維護自由人權是我們的責任』（維護自由人權是lán ê責任），有代表認為，若kā中華民國刣掉，外界恐驚ē誤解、牽涉意識形態，建議kā『吾黨』改掉就好，m̄-koh表決無通過。另外有代表講，新詞改做維護自由人權，是普世、bē變ê價值，原本就無牽涉意識形態，hōo各種皮膚色、人種、國籍ê政大人lóng願意開喙唱校歌，最後箭靶歌詞kuân票通過。

政大說明，前一擺（7月17）臨時校務會議經過來開會ê代表多元討論、齊全表達正面、倒面意見了後，完成修正六句歌詞。頭前四句表決通過維持原校歌歌詞；第五句改做『革新建設為民主』；第六句歌詞改做『理念貫徹，篤信力行』。

獨予你聽：

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

華語原文參考佇遮

延伸閱讀：
政大校歌原版歌詞kap箭靶歌詞ê對照（政大學生會面冊）
無聲的抗議：不合時宜的「黨國校歌」，難道只政大有而已嗎？（關鍵評論）

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。

請上【台語世界】閱讀閣較濟相關文章。