【台語世界／錄音】伊斯坦堡慢起飛

是按怎beh揀tsit篇：
去國外旅行，欣賞美景、認bat在地ê歷史文化，開闊心胸koh增加智識，路--裡ê ta̍p-ta̍p-tih-tih lóng thang tsiânn做lán成長ê營養分。旅遊文學是迷人--ê，後擺lán若出國tshit-thô，mā ē-tàng試用台語來記錄，tsiânn做台語文學成長ê營養分。

因為風颱，土耳其航空公司（簡稱土航）確定延後起飛阮欲坐轉去台灣ê班機，閣安排過境旅館予所有ê旅客歇睏食蹛。阮規團原底是來遮盤換飛行機niâ，若欲去過境旅館蹛tio̍h-ài申請入境；佳哉，台灣護照是會使在地用電子簽申請，雖然過程中有延tshiân，但是，濟少咱有學著佇國際機場拄著班機慢起飛ê應變管道佮處理程序。

「M̄是信伊斯蘭教ê Muslim（『穆斯林』），就是恐怖份子……」想起十外年前來佇土耳其旅遊，當地導遊佇紹介伊斯坦堡（Istanbul）ê一个景點ê時，捌按呢講--過。彼當時，阮對這个世界級大城市ê認捌，只有教科書頂所寫--ê，就是坦徛佇歐、亞兩洲ê戰略位置，控制uì烏海（Black Sea）到Aegean海（『愛琴海』），通地中海ê海運要道。

Bosporus海峽嘛號做伊斯坦堡海峽。Tng咱坐船搧海風咧遊賞其中一小段ê時，是身在天海相對（sio-tuì）、歐亞相相（sio-siòng）ê一个狗蟻空間內，心肝頭ke減會有寡感受──到底自古以來，這條海峽金金看過偌濟人間世事？遮的人間事佮伊斯坦堡ê位置有啥牽連影響？

順世間上細ê海──Marmara歐洲爿ê海岸落南來到Gallipoli半島，uì遮坐連bá-suh嘛thang載ê渡船，渡過Dardanelles海峽（土耳其話kā號做Çanakkale海峽），就來到亞洲這爿。佇美國2004年ê電影片Troy（『特洛伊：木馬屠城』）故事背景ê當地，咱才知影這个所在是比伊斯坦堡閣較有歷史--ê。規个基地雖然iáu咧進行古蹟研究調查，咱只會當佇有限ê範圍內行行看看，m̄-koh，tng咱徛佇彼拋荒ê遺蹟頂懸，看uì Aegean海ê時，電影內、三千外年前ê十年圍城戰事，就自然出現佇咱ê頭殼內。講實在，面對彼隻懸懸懸、大大大ê柴馬禮物ê時，當年城內ê人敢真正無kah一个人有掛礙？

佇小亞細亞Anatolia懸坪（kuân-phiânn）中西北部ê Ankara首都，有一座紀念現代土耳其開基祖──Mustafa Kemal Atatürk ê博物館。針對這段建國過程，佮澳紐軍團灣（Anzac Cove，註一）ê由來，影星Russell Crowe（『羅素克洛』）自導自演ê「伊斯坦堡救援（kiù-uān）（The Water Diviner，2014）」有交代。

Tann佇過境旅館歇有半晡較ke，予土航延後ê班機確定佇欲暗仔欲來起飛。咧前往伊斯坦堡Atatürk機場欲一點鐘ê車程--裡，過境旅館專車順Marmara海岸歐洲這爿向東行。有日頭、海水相伴，這tsuā飛行機慢起飛，阮m̄-nā抾著過去旅遊ê記持，嘛借影片史蹟ê串聯，加添咱台灣人罕得知影、關心ê世間大事……。

讀hōo你聽：

（作者是台灣母語聯盟理事；本文由台灣母語聯盟提供。）

註一：Anzac是Australian and New Zealand Army Corps ê縮寫，是1914～1916年間澳洲kap紐西蘭ê聯軍，bat參與第一次世界大戰。

註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】Uì Ganga到高屏溪，我kap土地ê對話
・【台語世界／錄音】用台語予世間人知影咱是台灣人 

若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。