緊來、緊來，趕緊來
我有好空--ê欲報逐家知
台語已經有專門ê電視台
節目趣味koh精彩
大人來看，笑hai-hai
囡仔來看，歡喜kah喙仔lī-sai-sai
公視台語台已經開始播出--lo͘h！是一台專門講台語ê電視台。內底節目精彩koh豐富。有新聞、運動kap做戲；有旅遊、環保kap地理；布袋戲、歌仔戲koh有唸歌詩；嘛有知識性ê謎猜kap遊戲；猶有我上愛ê bàng-gah蓋趣味。Chiah-ê節目大人囡仔攏kah意，保證逐家看kah笑微微。
若是beh講啥物節目較kah意，chit-má就來講hō͘恁鼻芳--一下。代先講著「全家有智慧」，是一个適合規家大細鬥陣看ê好節目。M̄-nā hō͘你增加智識、認bat台灣，koh會hō͘你ê台語講kah siah-siah叫。Koh來就是一个以小學生為主，知識性ê謎猜kap遊戲，叫做「旺梨西瓜仙拚仙」。伊是1个趣味koh有深度ê囡仔節目。M̄-nā hō͘咱了解真濟物件ê台語名，koh會hō͘咱台語講了較滑溜。
紲--落來，來講我上kah意ê節目，叫做「閻小妹」。這是一齣真好看ê bàng-gah。伊ê內容趣味koh豐富，有台灣ê民俗，像金門ê風獅爺kap客家ê油桐花；有台灣地牛翻身ê民間故事；koh有台灣ê地理、歷史kap環保ê智識。上主要--ê是tī食暗頓ê時播出。阮會當kap阿爸那食飯那看電視，順紲學台語。真正是「一兼二顧，摸蜊仔兼洗褲」。所以我beh tī chia kā逐家報，咱會當看電視學台語。
台灣字（白話字）版
Ta̍k-ke Lóng Lâi Khòaⁿ Tiān-sī O̍h Tâi-gí
Bûn, Lio̍k-im/ Kang Têng-chhiū
Kín-lâi, kín-lâi, kóaⁿ-kín-lâi
Góa ū hó-khang--ê beh pò ta̍k-ke chai
Tài-gî í-keng ū choan-bûn ê tiān-sī-tâi
Chiat-bo̍k chhù-bī koh cheng-chhái
Tōa-lâng lâi khòaⁿ, chhiò-hai-hai
Gín-á lâi khòaⁿ, hoaⁿ-hí kah chhùi-á lī-sai-sai
Kong-sī Tâi-gí-tâi í-keng khai-sí pò-chhut--lo͘h! Sī 1 tâi choan-bûn kóng Tâi-gí ê tiān-sī-tâi. Lāi-té chiat-bo̍k cheng-chhái koh hong-hù. Ū sin-bûn, ūn-tōng kap chò-hì; ū lí-iû, khoân-pó kap tē-lí; pò͘-tē-hì, koa-á-hì koh ū liām-koa-si; mā ū tì-sek-sèng ê bê-chhai kap iû-hì; iáu ū góa siōng ài ê bàng-gah kài chhù-bī. Chiah-ê chiat-bo̍k tōa-lâng gín-á lóng kah-ì, pó-chèng ta̍k-ke khòaⁿ kah chhiò-bi-bi.
Nā-sī beh kóng siáⁿ-mih chiat-bo̍k khah kah-ì, chit-má tō lâi kóng hō͘ lín phīⁿ-phang--chi̍t-ê. Tāi-seng kóng-tio̍h “Choân-ke Ū Tì-hūi”, sī 1 ê sek-ha̍p kui-ke tōa-sè tàu-tīn khòaⁿ ê hó chiat-bo̍k. M̄-nā hō͘ lí cheng-ka tì-sek, jīn-bat Tâi-oân, koh ē hō͘ lí ê Tâi-gí kóng kah siah-siah-kiò. Koh-lâi tō-sī 1 ê í sió-ha̍k-seng ûi chú, tì-sek-sèng ê bê-chhai kap iû-hì, kiò-chò “Ōng-lâi Si-koe Sian-piàⁿ-sian”. I sī 1 ê chhù-bī koh ū chhim-tō͘ ê gín-á chiat-bo̍k. M̄-nā hō͘ lán liáu-kái chin chē mi̍h-kiāⁿ ê Tâi-gí miâ, koh ē hō͘ lán Tâi-gí kóng-liáu khah ku̍t-liu.
Sòa--lo̍h-lâi, lâi kóng góa siōng kah-ì ê chiat-bo̍k, kiò-chò “Giâm-sió-moāi”. Che sī 1 chhut chin hó-khòaⁿ ê bàng-gah. I ê lāi-iông chhù-bī koh hong-hù, ū Tâi-oân ê bîn-sio̍k, chhiūⁿ Kim-mn̂g ê hong-sai-iâ kap Kheh-ka ê iû-tâng-hoe; ū Tâi-oân tē-gû hoan-sin ê bîn-kan kò͘-sū; koh ū Tâi-oân ê tē-lí, le̍k-sú kap khoân-pó ê tì-sek. Siōng chú-iàu--ê sī tī chia̍h àm-tǹg ê sî pò-chhut. Goán ē-tàng kap a-pah ná chia̍h-pn̄g ná khòaⁿ tiān-sī, sūn-sòa o̍h Tâi-gí. Chin-chiàⁿ sī “it kiam jī kò͘, bong lâ-á kiam sé-khò͘”. Só͘-í góa beh tī chia kā ta̍k-ke pò, lán ē-tàng khòaⁿ tiān-sī o̍h Tâi-gí.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
