【台語世界／錄音】​你台語認證--ah buē？

是按怎欲揀這篇：
感覺家己會曉台語，m̄-koh實際程度按怎？敢有法度thang測度？其實，無論民間抑是官方，攏有台語檢定thang考看覓。台語ê能力，m̄-nā是聽kap講，mā有讀kap寫，四項武藝tio̍h-ài齊備，才thang成做台語仙--喔。

根據聯合國教科文組織報告，台灣已經hông列入去母語滅絕（bia̍t-tsua̍t）ê危機（guî-ki）地區。台語mā teh掛急診（kip-tsín）--ah。講台語tng著時；台語認證tng時行。你講台語，你台語認證--ah buē？你kám台語認證--ah？台語能力認證考試至少ē-sái用tī下面tsit寡方面：

1. 了解台語教師本身ê台語能力kám有符合siōng kē ê要求（Beh擔任（tam-jīm）台語老師ê台語能力ài有B2（中高級））。
2. 了解台語學習者ê台語能力kám有進步。
3. Tsiânn做學校入學考、推甄（tshui-tsin）入學ê時，了解學生ê台語程度ê標準。像高雄市免試入學超額（gia̍h）比序項目增列「成大台語認證」證照：1)「中小學台語認證初級採計10分」。2)「全民台語認證（專業版）初級採計10分、中級以上採計20分」。
4. Tsiânn做檢定台文系所學生畢業前ê台語能力ê標準。
5. Tsiânn做公務人員、sing-lí界、出版業tsia--ê，需要用著台語人才ê時檢定in ê台語能力ê標準。
6. 了解台灣人民族母語流失ê速度。

Án-ne咱平常時beh án-tsuánn準備認證考試--leh？有寡phiat-pōo ē-tàng參考：

1. 講台語。Tī日常生活tsiânn做自然語言。
2. 看kap聽台語節目。
3. 看台語文文章、評論。
4. 寫台語文。學台語羅馬字。

Beh考台語認證無phiat-pōo，有聽、有講、有讀、有寫tio̍h進步。

語言失、文化亡、民族滅。「母語是上帝hōo每一个民族特別ê記號，有tsit種記號ê民族，tsiah會看著性命活著真有尊嚴（tsun-giâm）。」這是Ben Yehudah（『班．耶夫達』）對以色列（Í-sik-lia̍t）人民提出ê呼籲（hoo-io̍k）（盧俊義，2004）。咱ê肩胛頭lóng tann台語消失危機ê十字架（si̍p-jī-kè）。Ǹg-bāng透過全民來台語認證，鼓勵逐家做伙kā台語thn̂g（傳）--落-去。

2010年4月17，成大台灣語文測驗中心正式掛牌成立。中心ê宗旨（tsong-tsí）是beh促進（tshiok-tsìn）台灣語文教學kap檢定考試品質ê提升，thang發展台灣語言文化，koh呼應聯合國《世界文化多樣性宣言》內底，對各語言族群文化保障ê精神。目前是全國唯一專業台語文認證ê常態性機構（ki-kòo）。2010年正式開辦（khai-pān）「全民台語認證」，認證ê品質有達到語言測驗標準，是信效度kuân ê台語能力檢定測驗系統。全民台語認證主要目的是tsiânn做教育kap推廣台語ê用途，適合16歲以上ê成人來檢測ka-kī ê台語聽、講、讀、寫四方面ê語言能力程度。2011年正式開辦海外版國際台語認證；2012年正式開辦中小學生台語認證；2015年koh辦理白話字認證。Beh 10冬--ah，中心一直ka-kī tsông經費，積極（tsik-ki̍k）辦理台語認證，tshui-sak台語／文。

讀予你聽：

（作者是成大台灣語文測驗中心專員；本文由成大台灣語文測驗中心提供。）

註：本文使用教育部推薦漢字kap台羅。

延伸閱讀：
國立成功大學台灣語文測驗中心
教育部閩南語語言能力認證

若欲投稿，請寄：binpotgb@gmail.com，文章字數 600-800。
請至【台語世界】閱讀更多相關文章。