熱--人日頭當炎。蟬仔樹頂歡喜唱歌，鬧熱滾滾。雞公樹跤納涼，秋凊peh-hā，睏瞌睡倒tī塗跤。「Sia̍k、sia̍k、sia̍k、sia̍k！Sia̍k、sia̍k、sia̍k、sia̍k！」日頭愈猛，愈唱愈響。
雞公péng一下身，感覺ná ē chiah-nī噪人耳。Taⁿ頭一看，原來是蟬仔leh歡喜唱歌。雞公心想一計，ná m̄拐in飛落來hō͘我食點心。「蟬仔、蟬仔，恁ê歌聲有夠好聽，節奏輕快，聲韻真甜，請恁落來塗跤，唱hō͘阮聽好--無？」
「有影--o͘h！按呢tō請你繼續欣賞！」
「落--來--lah！落來塗跤唱較大聲。An-ní聽--起來加真sòa-phah。」
「眾兄弟，千萬m̄-thang落--去，he雞公在來攏是leh kā咱欺負，pō͘-pîn按呢kā咱o-ló，其中必有緣故。」
甜言蜜語m̄-thang誤解是金言玉語，花言巧語定著無安好心。
台灣字（白話字）版
Lah-jih Gū-giân: Siân Chhòng-tī Ke-kang
Bûn, Lo̍k-im/ Lah-jih(thè-hiu kok-hāu lāu-su)
Joa̍h--lâng ji̍t-thâu tng iām. Siân-á chhiū-téng hoaⁿ-hí chhiùⁿ-koa, lāu-jia̍t kún-kún. Ke-kang chhiū-kha nah-liâng, chhiu-chhìn peh-ha, khùn-ka-chōe tó tī thô͘-kha. "Sia̍k, sia̍k, sia̍k, sia̍k! Sia̍k, sia̍k, sia̍k, sia̍k!" Ji̍t-thâu lú mé, lú chhiùⁿ lú hiáng.
Ke-kang péng chi̍t-ē sin, kám-kak ná ē chiah-nī chhò-lâng-hīⁿ. Taⁿ-thâu chi̍t khòaⁿ, goân-lâi sī siân-á leh hoaⁿ-hí chhiùⁿ-koa. Ke-kang sim siūⁿ chi̍t kè, ná m̄ koái in poe lo̍h-lâi hō͘ góa chia̍h tiám-sim. "Siân-á, siân-á, lín ê koa-siaⁿ ū-kàu hó-thiaⁿ. Chiat-chàu khin-khoài, siaⁿ-ūn chin tiⁿ. Chhiáⁿ lín lo̍h-lâi thô͘-kha, chhiùⁿ hō͘ goán thiaⁿ hó--bô?"
"Ū-iáⁿ--o͘h! Án-ne tō chhiáⁿ lí kè-siok him-sióng!"
"Lo̍h--lâi--lah! Lo̍h-lâi thô͘-kha chhiùⁿ khah tōa-siaⁿ. Án-ne thiaⁿ--khí-lâi ke chin sòa-phah."
"Chiòng hiaⁿ-tī, chhian-bān m̄-thang lo̍h--khì. He ke-kang chāi-lâi lóng sī leh kā lán khi-hū. Pō͘-pîn án-ne kā lán o-ló, kî-tiong pit-iú iân-kò͘."
Tiⁿ-giân-bi̍t-gí m̄-thang gō͘-kái sī kim-giân-gio̍k-gí, hoa-giân-khá-gí tiāⁿ-tio̍h bô an hó-sim.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
