【專文】母親節的思念

5月初10和台北和平教會成年團契一群人，作伙深入遊淡水。走向真理大學的小路頂，經過「淡水女子學校」。這就是我已經過身真久的老母，生前時常提起的「無緣的淡水女學」。

阮老母出世在屏東竹仔腳下庄，一個算是富農的家庭。竹仔腳是在林邊、東港和新埤中間的一個小田庄。竹仔腳長老教會，是李庥牧師在1872年1月完成建堂，可容納300人做禮拜。這間教會在台灣基督長老教會宣教史有重要地位，彭明敏的阿祖彭士藏傳道、林茂生的老爸林燕臣牧師、以及高俊明牧師的阿伯高金聲牧師等，攏先後曾在竹仔腳教會宣教。我母系的先祖，就是在此受洗成做基督徒。

阮外公有三個後生丶五個查仔子，阮阿母是隨尾查仔子，只管一個小弟。大舅著繼承家業做食，只讀到公學校畢業，二舅和三舅攏送去日本讀醫科。因為重男輕女，四個阿姨攏無機會讀冊，竹仔腳教會牧師，就勸阮外公著予阮阿母去讀冊，所以，外公就透過牧師的推薦，去淡水女學予阮阿母註冊。

若講著讀冊，阮阿母著真怨嘆講：冊包、衫褲攏已經買好款好，準備要去入學的前一禮拜，外公忽然破病死去。隨落來，大舅掌家，可能猶原有重男輕女的思想，就無予阮阿母去入學。阮阿母後來只有在教會學白話字，伊知識的成長主要是靠讀《台灣教會公報》和其他白話字的出版。

陳師孟的大姊陳瑾華小學和我仝班，其實阮這級就只有一班，30幾個學生，幾乎攏是脫赤腳的草地囡仔。真心適，陳師孟的老爸有彼種眼光，會將伊送來這種初創的草地學校。陳瑾華是班長，我在學校若無守規矩，老師有必要就會吩咐伊來阮厝，向阮阿母告狀。

有一日，陳瑾華來阮厝看著阮阿母在讀聖經，伊感覺真奇怪，轉去向老母講：劉家阿姨會讀英文。陳師孟的老母毋相信，特別跑來問阮老母。我相信這大概是陳師孟的父母第一擺知樣，台灣人有「羅馬拼音」的白話字。

走過「淡水女子學校」予我想起已經過身28冬的老母。當時在這間學校畢業的女性，真濟後來攏真有成就。若阮阿母當時有來此讀，我相信伊後來祙嫁予阮老爸，也就是，可能著無我的出世。人類的科技仍無法度轉去過去，改變時空的方向，只能心存好奇。特別寫這篇做為母親節的思念。