【台語世界／錄音】雙語教育在台灣

是按怎beh揀tsit篇：
歇假ê日子，lán ē-sái uì真濟方面來思考「國家」ê意義，可比「語言」。Lán ê國家beh講啥mih款ê話？Kám是英語、華語？啊lán逐族群ê母語--leh？多元語言ê社會--裡，制定語言政策是挑戰，m̄-koh lán千萬tio̍h m̄-thang tuè人講話，suah kā家己ê話放bē記。

聽講台灣teh-beh發展雙語教育，台灣beh tsiânn做雙語國家。新聞報紙按呢寫。聽講行政院長賴清德運用伊ê權勢，無經過任何合法ê程序，已經tī教育部設立一个英語推動委員會，beh推動英語tsiânn做台灣ê官方語言。網路mā傳講，已經beh uì幼稚園開始實施雙語教育--lah！

最近有真濟假新聞，造成國家真大ê困擾！我相信網路teh傳--ê，新聞teh播--ê，聽來講去ê這个賴清德英語政策是一條假新聞。希望咱政府ài出面澄清，若無，這款假新聞絕對會造成人民對政府ê無信任，造成長期支持民進黨政府ê人民，開始對伊失去信心。因為會beh按呢想、beh按呢做，m̄是為台灣好，是beh hōo台灣母語「緊死緊好」。

啥物是雙語教育？雙語教育有兩款，一款叫做過渡性雙語教育，一款叫做發展性雙語教育。若是雙語教育在台灣，自來lóng是過渡性--ê，lóng是「柺仔」ê雙語教育──一向lóng是kā母語當做柺仔來使用，主要ài咱ê人會曉講殖民者ê話，然後kā柺仔擲掉。日本人來殖民台灣ê時，tī國民學校實施ê雙語教育就是按呢。中國人來ê時，mā是按呢。Tsit-má台灣人ê政府，中華民國在台灣，beh實施ê雙語教育，敢會猶原是殖民性質ê內殖民（賴〈lāi〉殖民？）ê雙語教育，目的是beh hōo咱放棄華語，過渡到英語？這遍是beh用華語做柺仔，thang會曉用英語行路？

問題是：這beh thài有可能達成？咱a̍h無英語殖民母國ê強制資源，譬如講英語殖民政府ê軍事靠山、英語殖民者thàng海ê母語教師資源，咱敢是用戇想就會當完成過渡到英語國家ê目的？全世界敢有這款例？

若無，咱敢m̄是長期以來就lóng非常認真teh推行英語教育？國內本來mā有bē少華英雙語ê幼稚園，是按怎咱目前台灣ê英語能力iáu m̄是真好？Kā英語訂做官方語言，tsia-ê本底無存在ê資源就會雄雄uì天頂跋--落-來？

我是一个英語教師出身、目前iáu tī國外用英語教台語teh生活ê人，照講我應該真支持這款英語政策，但是我無法度目睭kheh-kheh，良心放hōo狗食，m̄講良心話。台灣若真正beh實施雙語教育，應該實施「發展性」ê雙語教育──就是母語kap英語ê雙語教育，雙語攏同時發展、同時學好，母語無tsiânn做柺仔。按呢做，咱mā會tsiânn做英語真強ê國家，koh保存咱ê母語、保存咱ê文化，bē tsiânn做不孝ê囝孫。若是真正實施「賴（lāi）」殖民ê英語華語雙語語言政策，咱ê母語絕對會加速死亡！

讀hōo你聽：

（作者是台灣師範大學台灣語文學系退休教授；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】英語kám是世界通用語？
・【台語世界／錄音】英語beh tsiânn做第二官方語言？ 

若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。