「有錢無錢，娶某過年。」50冬前真正tī chit款情形下完成終身大事。結婚hit工是1969年2月13日(咱人過年前3工，農曆12月27日)。斯當時tăⁿ退伍2 kò外月，並無粒積存錢，攏是大兄借錢發落聘金，閣辦50桌鬧熱宴席。真正滿50週年金婚記念日是今年2019年2月13日，並m̄是咱人過年前3工。
無初戀無熱戀，kan-nā熟似見面2-3擺tō決定牽手行向未來ê傳統婚姻，主要原因是一个想boeh娶、一个想boeh嫁，因緣到位才結了姻緣。ē記得洞房hit暝有kā牽手講：「咱chit-mái開始來戀愛！」Tō佇結婚戀愛中，開始互相了解互相扶持，共同phah拚家己ê未來經營家己ê人生。
散教員，經濟需要牽手tàu相共，kah目是意愛ê開始，it-tio̍h ē-tàng tàu趁錢是現實ê條件，牽--ê一手西裝師傅功夫，真正是經濟上大幫贊，我mā無失伊ê禮，真緊tō ùi師仔工學到ē-hiáu裁剪車紩ê褲師，婦唱夫隨經營西裝社。有我教師月給kap店面收入，chiah有才調養飼栽培4个囡仔大漢、教育、嫁娶。結婚50冬，前25年為家庭經濟phah拚，後25年為台語文kut-la̍t做工。
1969年結婚了後，牽--ê經營西裝社兼家庭主婦，我是學校教冊，下班kā牽--ê tàu跤手，一个家庭ùi無到有，會得kap人比phēng徛起，三頓會得過，囡仔會得歡歡喜喜讀冊過日，攏是佇khiû-khiû儉儉利不及費，先賒先借計畫中經過，第一要緊tō是m̄-thang hō͘四個囡仔有缺乏ê壓力。
稅厝徛有九冬，搬徙三擺，厝稅月月ân，mā有搪著chau-that橫逆ê人情冷暖！總--是tī牽--ê ê穩在智慧中幫贊渡過難關。Tō tī稅厝徛九冬後，蓄一間11坪闊兩樓徛家，m̄-nā囡仔自在讀冊，大人mā感覺自在有目標。
1992年，頭一擺熟似十五音ê台語韻書，1994年開始踏入台語文運動，phah拚學習台語文書寫推sak事工，因為有牽手賢慧骨力做後撐，chiah-thang穩穩在在做出一寡成績，貢獻一寡能力，雖罔m̄是夫唱婦隨，牽--ê放心hō͘我四界行踏支持台文運動，百分百ê助力，牽--ê功勞佔一半。
想起50冬前是懵懂人生，自從結婚了後，牽手行到此當今，進入彩色世界，歡喜兩人生活綴有著時代，mā歡喜繼續行向未來。
台灣字（白話字）版
Kim-hun Kì-liām-ji̍t Khan-chhiú Chìn-hêng-sek
"Ū-chîⁿ bô-chîⁿ, chhōa-bó͘ kòe-nî. " 50 tang chênng chin-chiàⁿ tī chit-khoán chêng-hêng hā oân-sêng chiong-sin tāi-sū. Kiat-hun hit-kang sī 1969-nî 2-goe̍h 13-ji̍t (lán-lâng kòe-nî chêng 3-kang, lông-le̍k 12-goe̍h 27-ji̍t). Su-tong-sî tăⁿ thè-ngó͘ 2-kò-gōa-goe̍h, pēng-bô lia̍p-chek chhûn-chîⁿ. Lóng-sī tōa-hiaⁿ chioh-chîⁿ hoa̍t-lo̍h phèng-kim, koh pān 50-toh lāu-jia̍t iàn-se̍k. Chin-chiàⁿ móa 50-chiu-nî kim-hun kì-liām-ji̍t sī kin-nî 2019-nî 2-goe̍h 13-ji̍t, pēng m̄-sī lán-lâng kòe-nî-chêng 3-kang.
Bô chho͘-loân bô jia̍t-loân, kan-nā se̍k-sāi kìⁿ-bīn 2-3-pái tō koat-tēng khan-chhiú kiâⁿ-hiòng bī-lâi ê thoân-thóng hun-in. Chú-iàu goân-in sī chi̍t-ê siūⁿ-boeh chhōa, chi̍t-ê siūⁿ-boeh kè. In-iân kàu-ūi chiah kiat-liáu in-iân. Ē-kì-tit tōng-pâng hit-mê ū kā khan-chhiú kóng: "Lán chit-mái khai-sí lâi loân-ài! " Tō tī kiat-hun loân-ài tiong, khai-sí hō͘-siāng liáu-kái hō͘-siāng hû-chhî, kiōng-tông phah-piàⁿ ka-kī ê bī-lâi keng-êng ka-kī ê jîn-seng.
Sàn kàu-oân, keng-chè su-iàu khan-chhiú tàu-saⁿ-kāng. Kah-ba̍k sī ì-ài ê khai-sí, it-tio̍h ē-tàng tàu thàn-chîⁿ sī hiān-si̍t ê tiâu-kiāⁿ. Khan--ê chi̍t-chhiú se-chong sai-hū kang-hu, chin-chiàⁿ sī keng-chè siāng-tōa pang-chān. Góa mā bô sit i-ê lé, chin-kín tō ùi sai-á o̍h kàu ē-hiáu chhâi-chián chhia-thīⁿ ê khò͘-sai. Hū chhiàng hu sûi keng-êng se-chong-siā. Ū góa kàu-su goe̍h-kip kap tiàm-bīn siu-ji̍p, chiah ū-châi-tiāu iúⁿ-chhī chai-pôe 4-ê gín-á tōa-hàn, kàu-io̍k, kè-chhōa.Kiat-hun 50-tang, chêng 25-nî ūi ka-têng keng-chè phah-piàⁿ, āu 25-nî ūi Tâi-gí-bûn kut-la̍t chò-kang.
1969-nî kiat-hun liáu-āu, khan--ê keng-êng se-chong siā kiam ka-têng chú-hū. Góa-sī ha̍k-hāu kà-chheh. Hā-pan kā khan--ê tàu-kha-chhiú. Chi̍t-ê ka-têng ùi bô kàu ū, ē-tit kap lâng pí-phēng khiā-khí. Saⁿ-tǹg ē-tit kòe. Gín-á ē-tit hoaⁿ-hoaⁿ-hí-hí tha̍k-chheh kòe-ji̍t. Lóng-sī tī khiû-khiû-khiām-khiām lī put-ki̍p hùi, seng sia seng chioh kè-ōe tiong keng-kòe. Tē-it iàu-kín tō sī m̄-thang hō͘ sì-ê gín-á ū khoat-ha̍t ê ap-le̍k.
Sòe-chhù-khiā ū káu-tang. Poaⁿ-sóa saⁿ-pâi. Chhù-sòe goe̍h goe̍h ân. Mā-ū tn̄g-tio̍h chau-that hoâiⁿ-ge̍k ê jîn-chêng léng-loán! Chóng--sī tī khan--ê ê ún-chāi tì-hūi tiong pang-chān tō͘-kòe lân-koan. Tō tī sòe-chhù-khiā káu-tang āu, hak chi̍t-keng 11-pêⁿ khoah nn̄g-lâu khiā-ke, m̄-nā gín-á chū-chāi tha̍k-chheh, tōa-lâng mā kám-kak chū-chāi ū-bo̍k-phiau.
1992-nî, thâu-chi̍t-pái se̍k-sāi Si̍p-ngó͘-im ê Tâi-gí ūn-su. 1994-nî khai-sí ta̍h-ji̍p Tâi-gí-bûn ūn-tōng. Phah-piàⁿ ha̍k-si̍p Tâi-gí-bûn su-siá chhui-sak sū-kang. In-ūi ū khan-chhiú hiân-hūi kut-la̍t chò āu-thèⁿ, chiah-thang ún-ún chāi-chāi chò-chhut chi̍t-kóa sêng-chek, kòng-hiàn chi̍t-kóa lêng-le̍k. Sui-bóng m̄-sī hu chhiàng hū sûi, khan--ê hòng-sim hō͘-góa sì-kè kiâⁿ-ta̍h chi-chhî Tâi-bûn ūn-tōng, pah-hun-pah ê chō͘-la̍t, khan--ê kong-lô chiàm chi̍t-pòaⁿ.
Siūⁿ-khí 50-tang chêng sī bóng-tóng jîn-seng, chū-chiông kiat-hun liáu-āu, khan-chhiú kiâⁿ-kàu chhú-tong-kim, chìn-ji̍p chhái-sek sè-kài. Hoaⁿ-hí nn̄g lâng tòe-ū-tio̍h sî-tāi, mā hoaⁿ-hí kè-siok kiâⁿ-hiàng bī-lâi.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
