「欠水」是氣候變遷全世界攏愛面對的挑戰，台灣mā仝款。2020年是台灣按1964年以來第一擺攏無風颱入來，致使桃園以南到嘉義的雨水是有史以來上少的，所以無水通好種作。佇桃園、新竹kap苗栗地區停止淹田了後，無偌久嘉南平原mā宣佈停止沃田水愛休耕。規个台灣欠水的情況是一工比一工閣較食力。
2020年台灣當teh面對56冬來上大的洘旱。長期無落雨造成洘旱嚴重，予景色優美會當坐船遊山花1的日月潭焦涸涸變成一片大草埔，連台灣上長的濁水溪mā出現真罕見的斷流，予原本佇溪--lí的魚仔kap蝦仔因為無水攏反肚死了了。
台灣是四面環海的海島國家，平均降雨量是全球的2.5倍。毋閣水資源因為濟濟因由拍損去的比留落來的koh較濟。致使常在有欠水的危機，毋才有一句「台灣三冬小旱，五冬大洘旱」。面對56冬來上嚴重的欠水危機，高雄市長陳其邁mā專工錄台語的省水宣導綴糞埽車四界放送。提醒市民這站仔台灣雨水較少，有一寡所在已經無水通用。拜託逐家愛寶惜咱的水資源，水盡量回收儉儉仔用。
佇氣候變遷全球攏欠水嚴重的年代，若欲有水通用就愛會記得「好天也著積雨來糧」。所以經濟部水利署按日常生活就教民眾濟濟省水的撇步。像洗身軀用chhiâng--的，覓用浸--的。Làu燒水進前的冷水會使sîn--起來，按ne就有法度省幾仔十公升的水。洗菜、洗碗箸kā水làu佇碗斗較省水；平時仔若洗菜、洗果子ā是洗米的水會當提來沃花；若是洗衫、洗身軀hām洗碗箸的水，mā攏會當回收提來洗車、揉塗跤、沖屎桶。猶有厝內的洗衫機、屎桶kap水道頭會當換有省水標頭的產品，毋但輕鬆省水koh省錢，真正是一兼二顧，摸蜊仔兼洗褲。
咱地球的水資源是有限的，逐滴水攏足珍貴。所以省水袂使干焦是口號niā-niā。每一人定著愛拍拚改變生活慣勢kap寶惜咱的每一滴水，才有法度面對氣候變遷所引起的欠水威脅kap挑戰。
「欠水」是氣候變遷全世界攏愛面對的挑戰，台灣mā仝款。
台灣字（白話字）版
Pó-sioh Lán Ê Chúi chu-goân
“Khiàm-chúi” sī khì-hāu piàn-chhian choân sè-kài lóng ài bīn-tùi ê thiau-chiàn, Tâi-oân mā kâng-khóaⁿ. 2020 nî sī Tâi-oân án 1964 nî í-lâi tē-it-pái lóng bô hong-thai ji̍p--lâi, tì-sú Thô-hn̂g í lâm kàu Ka-gī ê hō͘-chúi sī iú-sú í-lâi siōng chió ê, só͘-í bô-chúi thang-hó chèng-chok. Tī Thô-hn̂g, Sin-tek kap Biâu-le̍k tē-khu thêng-chí im-chhân liáu-āu, bô-gōa-kú ka-lâm pêng-gôan mā soan-pò͘ thêng-chí ak chhân-chúi ài hiu-keng. Kui ê Tâi-oân khiàm-chúi ê chêng-hóng sī chi̍t-kang pí chi̍t-kang koh-khah chia̍h-la̍t.
2020 nî Tâi-oân bīn-tùi 56 tang lâi siōng tōa ê khó-hōaⁿ. Tn̂g-kî bô lo̍h-hō͘ chō-sêng khó-hōaⁿ giâm-tiōng, hō͘ kéng-sek iu-bí ē-tàng chē-chûn iû-soaⁿ-hoe ê Ji̍t-go̍at-thâm ta-khok-khok piàn-sêng chit phìⁿ tōa chháu-po͘, liân Tâi-oân siōng-tn̂g ê Lô-chúi-khe mā chhut-hiām chin hán-kìⁿ ê tn̄g-lâu, hō͘ goân-pún tī khe--lí ê hî-á kap hê-á in-ūi bô-chúi lóng péng-tō͘ sí-liáu-liáu.
Tâi-oân sī sì-bīn khôan-hái ê hái-tó kok-ka, pêng-kun kàng-hō͘-liōng sī choân-kiû ê 2.5 pōe. M̄-koh chúi chu-goân in-ūi chē-chē in-iû phah-sńg--khí ê pí lâu--lo̍h-lâi ê koh khah-chē. Tì-sú chhiâng-chāi ū khiàm-chúi ê gûi-ki, m̄-chiah ū chi̍t-kù “Tâi-oân saⁿ-tang sió-hōaⁿ, gō͘-tang tōa khó-hōaⁿ”. Bīn-tùi 56 tang lâi siōng giâm-tiōng ê khiàm-chúi gûi-ki, Ko-hiông chhī-tiúⁿ Tân Kî-māi mā choan-kang lo̍k Tâi-gí ê séng-chúi soan-tō tòe pùn-sò-chhia sì-kè hòng-sàng. Thê-chhéⁿ chhī-bîn chit-chām-á Tâi-oân hō͘-chúi khah-chió, ū chi̍t-kóa-á só͘-chāi í-keng bô-chúi thang-iōng. Pài-thok ta̍k-ke ài pó-sioh lán ê chúi chu-goân, chúi chīn-liōng hôe-siu khiām-khiām-á iōng.
Tī khì-hāu piàn-chhian choân-kiû lóng khiàm-chúi giâm-tiōng ê nî-tāi, nā beh ū chúi thang iōng tō ái ē-kì-tit “ Hó-thiⁿ iā tio̍h chek-hō͘ lâi niû”. Só͘-í Keng-chè-pō͘ Chúi-lī-sú án ji̍t-siông seng-oa̍h tō kà bîn-chiòng chē chē séng-chúi ê phiat-pō͘. Chhiūⁿ sé-sin-khu iōng tshiâng--ê, mài iōng chìm--ê. Làu sio-chúi chìn-chêng ê léng-chúi ē-sái sîn--khì-lâi, án-ne tō ū-hoat-tō͘ séng kúi á cha̍p kong-seng ê chúi. Sé-chhài, sé-óaⁿ-tī kā chúi làu tī óaⁿ-táu khah séng-chúi; pêng-sî-á nā sé-chhài, sé kóe-chí ā-sī sé-bí ê chúi ē-tàng the̍h lâi ak-hoe, nā-sī sé-saⁿ, sé-sin-khu hām sé-óaⁿ-tī ê chúi, mā lóng ē-tàng hôe-siu the̍h lâi sé-chhia, jiû-thô͘-kha, chhiong sái-tháng. Iáu-ū chhù-lāi ê sé-saⁿ-ki, sái-tháng kap chúi-tō-thâu ē-tàng ōaⁿ ū séng-chúi phiau-thâu ê sán-phín, m̄-nā khin-sang séng-chúi koh séng-chîⁿ, chin-chiàⁿ sī it kiam jī kò͘, bong lâ-á kiam sé khò͘.
Lán tē-kiû ê chúi chu-goân sī iú-hān ê, ta̍k tih chúi lóng chiok tin-kùi. Só͘-í séng-chúi bē-sái kan-taⁿ sī kháu-hō niā-niā, múi-chi̍t-ê lâng tiāⁿ-tio̍h ài phah-piàⁿ kái-piàn seng-oa̍h koàn-sì kap pó-sioh lán ê múi chi̍t tih chúi, chiah ū-hoat-tō͘ bīn-tùi khì-hāu piàn-chhian só͘ ín-khí ê khiàm-chúi ui-hia̍p kap thiau-chiàn.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
